Թեհրանը մշակում է նոր օպերատիվ ծրագրեր, որոնք պետք է ամերիկյան ռազմական նավերին ստիպեն էլ ավելի հեռանալ Իրանի ափերից։ Այդ մասին հայտարարել է Իրանի բանակի ներկայացուցիչ, բրիգադային գեներալ Մոհամմադ Աքրամինիան, հաղորդում է Mehr-ը։

Նա ընդգծել է, որ, հակառակ ԱՄՆ նախագահ Դոնալդ Թրամփի բազմիցս արված հայտարարությունների, Իրանի հակաօդային պաշտպանության ներկայիս հնարավորությունները զգալիորեն գերազանցում են ինչպես պատերազմի նախօրեին, այնպես էլ մարտական գործողությունների ընթացքում գրանցված ցուցանիշները։

Գեներալի խոսքով՝ վերջին շաբաթներին Իրանի հակաօդային պաշտպանության ստորաբաժանումները երկրի օդային տարածքում հաջողությամբ խոցել են մի քանի ամերիկյան անօդաչու թռչող սարքեր։ Նա նաև պնդում է, որ ամերիկյան ռազմական նավերը ստիպված են եղել հեռանալ Պարսից ծոցի ափերից ավելի քան 500 կիլոմետր հեռավորության վրա։

Նրա խոսքով՝ իրանական զինվորականները հաջողությամբ մշակել և իրականացրել են առաջավոր, համալիր և նորարարական գործողություններ։

Գեներալը նաև նշել է, որ երկրի ազգային հակաօդային պաշտպանության համակարգը նախապատերազմյան շրջանի համեմատ զգալիորեն ամրապնդվել է։ «Օրմուզի նեղուցից արևելք ներկայիս անկայունությունը ԱՄՆ-ի կործանարար ներկայության անմիջական հետևանքն է», — հայտարարել է նա։

Աքրամինիանը հավելել է, որ տարածաշրջանի երկրներն ու միջազգային հանրությունը պետք է ճանաչեն Միացյալ Նահանգները որպես տարածաշրջանում անկայունության հիմնական պատճառ։