Աղետի գոտու բնակավայրերում պետական աջակցությամբ իրականացվող բնակարանային շինարարության ծրագրի շրջանակներում ՀՀ Շիրակի մարզի Գյումրի քաղաքի «Մուշ 2-2» եւ «Անի» թաղամասերում «Գլենդել Հիլզ» ՓԲԸ-ի կողմից կառուցված եւ առաջիկայում շահագործման հանձնվող 38 շենքերի արտաքին բարեկարգման եւ թվով 1756 բնակարանների ներքին  հարդարման աշխատանքների որակի համապատասխանությունը ուսումնասիրելու նպատակով, ՀՀ քաղաքաշինության նախարար Սամվել Թադեւոսյանի սեպտեմբերի 25-ի հրամանով, ստեղծվել է հանձնաժողով`  Քաղաքաշինական ԾԻԳ-ի տնօրենի տեղակալ Վահան Սարգսյանի գլխավորությամբ: Հանձնաժողովի կազմում են ՀՀ քաղաքաշինության նախարարության Քաղաքաշինական ԾԻԳ-ի եւ Քաղաքաշինական պետական տեսչության  մասնագետներ, ինչպես նաեւ «Շիրակ կենտրոն» ՀԿ նախագահը:

Վերոնշյալ հրամանի համաձայն` աշխատանքները իրականացվելու են  կառուցապատողի` «Գլենդել Հիլզ» ՓԲԸ-ի ներկայացուցիչների մասնակցությամբ, որոնք անհրաժեշտության դեպքում, եռօրյա ժամկետում միջոցներ կձեռնարկեն  թերություններն ու բացթողումները վերացնելու համար: Հանձնաժողովին հանձնարարված է մինչեւ սեպտեմբերի 29-ը ՀՀ քաղաքաշինության նախարարին ներկայացնել  տեղեկանք` իրականացված ուսումնասիրության արդյունքների եւ ձեռնարկված միջոցառումների մասին :

Վերոնշյալ հրամանը հետեւել է նույն օրը, ՀՀ քաղաքաշինության նախարար Սամվել Թադեւոսյանի Գյումրու «Մուշ 2-2» եւ «Անի» թաղամասեր կատարած այցին: Նախարար Թադեւոսյանն այցելել էր  վերոնշյալ թաղամասեր` շահագործման հանձնելուց առաջ,  շինարարության ավարտական աշխատանքներին ծանոթանալու նպատակով: