նախընտրելի դարձնելՇուրջ 46 հազար մարդ Սպիտակ տանը (ԱՄՆ) կոչ են արել վերանայել «Մագնիտսկու ցուցակում» ընդգրկված Ռուսաստանի Պետդումայի պատգամավորների ազգանունները: Խնդրագիրը տեղադրված է ԱՄՆ-ի Սպիտակ տան վեբ կայքում: Ստորագրածների մեծ մասը ռուսախոս են:
Ըստ ստորագրողների` օրենսդիրները վտանգի տակ են դրել հազարավոր ռուս որբերի կյանքն ու բարեկեցությունը, որոնցից շատերը, որոնք հիվանդ են կամ հաշմանդամ, զրկվում են ողջ մնալու հնարավորությունից, եթե միջազգային որդեգրման արգելքն ուժի մեջ մտնի:
Միջնորդությունը կոչ է անում բացահայտել բոլոր նրանց, ովքեր պատասխանատու են այդ բանաձեւի ընդունման համար, եւ նրանց ընդգրկել «Մագնիտսկու ցուցակում», հայտնում է «ԱիՖ»-ը:
Այդ խնդրագրին զուգահեռ Սպիտակ տան վեբ կայքում կիրակի երեկոյան մի այլ խնդրագիր է տեղադրվել, որն ԱՄՆ-ի նախագահ Բարաք Օբամայի աշխատակազմին կոչ է անում «Մագնիտսկու ցուցակում» ընդգրկել ՌԴ նախագահ Վլադիմիր Պուտինին, եթե նա ստորագրի «Դիմա Յակովլեւի օրենքը»:
Ներկայումս խնդրագիրը ստորագրել է 22 հազար մարդ: Որպեսզի դիմումն իշխանությունները վերանայեն, անհրաժեշտ է 25 հազար ստորագրություն:
Հիշեցնենք, որ դեկտեմբերի 21-ին Պետդուման երրորդ ընթերցմամբ ընդունել էր «Դիմա Յակովլեւի օրենքը», որը համարվում է պատասխան քայլ դեկտեմբերի 6-ին ԱՄՆ-ի սենատորների կողմից ընդունած «Մագնիտսկու օրենքին»:
Պատգամավորները որոշել են օրենքի ուժը տարածել այն երկրների վրա, որտեղ խախտվում են ռուս քաղաքացիների իրավունքները:
Դեկտեմբերի 6-ին ԱՄՆ-ի Սենատը ընդունել էր «Մագնիտսկու օրենքը», որն արգելում է երկիր Ռուսաստանի այն քաղաքացիների մուտքը, որոնք մասնակցել են բանտում իրավաբան Սերգեյ Մագնիտսկու մահվանը: «Մագնիտսկու ցուցակում» ընդգրկվել են ավելի քան 60 ռուս պաշտոնյաներ եւ ոստիկանության, դատախազության եւ դատական համակարգի աշխատակիցներ:
