նախընտրելի դարձնելԱֆղանստանում ամերիկացիների հետ կապված երկու միջադեպ է տեղի ունեցել. ամերիկյան զորքերի ծառայողներից մեկն սպանվել է տեղացի կին ոստիկանի կողմից, երկրորդն ինքնասպան է եղել:
Առաջին միջադեպը տեղի է ունեցել դեկտեմբերի 24-ին` Քաբուլի ոստիկանության գրասենյակում: Դեռեւս հայտնի չէ` սպանությունն արդյոք կանխամտածված է եղել, թե պատահական:
Քաբուլի քրեական ոստիկանության գերատեսչության ղեկավար Մոհամադ Զահիրը դեպքնն անվանել է «ինսայդերական հարձակում»: ՆԱՏՕ-ի ներկայացուցիչները եւս հաստատել են, որ զոհված ամերիկացի հրահանգիչը սպանվել էր աֆղանական ոստիկանության աշխատակցուհու հարձակման հետեւանքով, հաղորդում է Reuters-ը:
Նշենք, որ այս տարի նմանատիպ հարձակումներից արդեն սպանվել է ՆԱՏՕ-ի 52 զինծառայող: Սակայն, հնարավոր է, սա առաջին դեպքն է, երբ հարձակման հեղինակը կին է, հայտնում է NEWSru.com-ը:
Ավելի վաղ ՆԱՏՕ-ն եւս մեկ կորուստ էր ունեցել` դեկտեմբերի 22-ին: ԱՄՆ-ի ռազմածովային ուժերի վերնախավային հատուկ ստորաբաժանման հրամանատար 42-ամյա Ջոբ Փրայսին մահացած էին գտել Աֆղանստանի Ուրուզգան նահանգի իր բնակարանում: Այս պահին մահվան հիմնական վարկածն ինքնասպանությունն է:
