Նախընտրելի
Հայաստանի պետական եկամուտների կոմիտեն հրապարակել է 2012 թվականի հունվար-դեկտեմբեր ժամանակահատվածի առաջին հազար խոշոր հարկ վճարողների ցանկը` համաձայն վճարված հարկերի եւ տուրքերի մեծության: Ցանկում ընդգրկված են նաեւ ՀՀ ուսումնական հաստատություններ եւ կրթական ծառայություն մատուցող կազմակերպություններ` այդ թվում 13 բուհեր, Կրթության ազգային ինստիտուտը եւ Շիրակացիի անվան ճեմարան կրթահամալիրը:
Խոշոր հարակատու բուհերի ցուցակը գլխավորում է Մ. Հերացիի անվան բժշկական պետական համալսարանը, որը ցուցակում զբաղեցնում է 112-րդ տեղը՝ 834 մլն 534 հազար դրամ վճարման ցուցանիշով:
Երկրորդը` Երեւանի պետական համալսարանն է ՝145-րդ տեղ (վճարել է 668 մլն 793 հազար դրամ ) , երրորդը` Հայաստանի պետական տնտեսագիտական համալսարանը (286-րդ տեղ՝ 324 մլն 76 հազար դրամ), իսկ Խ. Աբովյանի անվան հայկական պետական մանկավարժական համալսարանը չորրորդն է (291-րդ տեղ՝ 318 մլն 191 հազար դրամ):
Խոշոր հարկատուների ցանկում ընդգրկված են Հայաստանի ամերիկյան համալսարանը, Հայաստանի պետական ճարտարագիտական համալսարանը, Երեւանի ճարտարապետության եւ շինարարության պետական համալսարանը, Հայաստանի պետական ագրարային համալսարանը, Ռուս-հայկական(սլավոնական) համալսարանը, Երեւանի Բրյուսովի անվան պետական լեզվաբանական համալսարանը, Եվրոպական տարածաշրջանային ակադեմիան, Գյումրու Նալբանդյանի անվան մանկավարաժական ինստիտուտը, Վանաձորի Հ. Թումանյանի անվան պետական մանկավարժական ինստիտուտը:
Բարեխղճորեն կատարելով պետության նկատմամբ իրենց հարկային պարտավորությունները, թվարկված կրթական կազմակերպություններն ընդհանուր առմամբ պետական բյուջե են մուծել շուրջ 3,9 մլրդ. դրամ: Ի դեպ նախորդ տարվա՝ 2011 թվականի ցուցանիշը եղել է շուրջ 3,3 մլրդ դրամ:
