նախընտրելի դարձնել
Փետրվարի 6-ին ՄԱԿ-ի կենտրոնատեղիում կայացել է կազմակերպության Մանկական հիմնադրամի (UNICEF) կողմից կազմակերպված «Ներառական կրթություն հաշմանդամություն ունեցող երեխաների համար» խորագրով բարձր մակարդակի քննարկում, որին ներկա են գտնվել ՄԱԿ-ում հավատարմարված անդամ պետությունների դեսպանները եւ պատվիրակությունները, ՄԱԿ-ի քարտուղարության տարբեր կառույցների ղեկավարներ, ինչպես նաեւ միջազգային հասարակական կազմակերպությունների բազմաթիվ ներկայացուցիչներ:
Քննարկումը նախագահել է UNICEF-ի գործադիր խորհրդի նախագահը, իսկ բացման խոսքով հանդես է եկել նաեւ UNICEF-ի գործադիր տնօրեն Էնթոնի Լեյքը:
Քննարկմանը որպես հիմնական բանախոս հանդես է եկել ՄԱԿ-ում ՀՀ մշտական ներկայացուցիչ դեսպան Կարեն Նազարյանը, ով ներկայացրել է հաշմանդամություն ունեցող երեխաների ներառական կրթության բնագավառում Հայաստանի անցած ուղին, ներկա վիճակը, ձեռքբերումներն ու խնդիրները, ինչպես նաեւ ապագա ծրագրերն՝ այդ թվում կառավարության օրենսդրական նախաձեռնությունները: Դեսպան Նազարյանն ընդգծել է, որ տվյալ բնագավառում արձանագրված առաջընթացը հնարավոր է դարձել ՀՀ կրթության ու գիտության նախարարության, ՄԱԿ-ի մանկական հիմնադրամի, հայկական ու միջազգային հասարակական կազմակերպությունների եւ դոնոր երկրների միջեւ համագործակցության ու հետեւողական համատեղ ջանքերի արդյունքում:
