նախընտրելի դարձնելՀայաստանի քաղաքացիները պետք է ուղիղ ժողովրդավարության լծակների իրավունք ունենան` անկախ գործող իշխանությունից: Այս մասին փետրվարի 13-ին Գյումրիում ընտրողների հետ հանդիպմանն ասաց նախագահի թեկնածու Պարույր Հայրիկյանը:
«Համապատասխան թվով ստորագրությունների դեպքում հնարավոր կլինի այս կամ այն հարցի վերաբերյալ հանրաքվե անցկացնել, սակայն միակ պայմանը պետք է լինի այն, որ բարձրացված հարցը չպետք է հակասահմանադրական լինի»,-նշեց թեկնածուն:
Նրա խոսքով` սահմանադրական բարեփոխումներից հետո, որոնք կիրականացվեն առավելագույնը 2 տարվա ընթացքում, խորհրդարանն ազատ կարձակվի: «Հայաստանի Ազգային ժողովը պետք է լինի աշխարհի ամենաներկայացուցչական օրենսդիր մարմինը: Խորհրդարանական ընտորություններից հետո ես, որպես նախագահ, նույնպես կհրաժարվեմ պաշտոնից, կմնան միայն վարչապետի եւ փոխվարչապետի պաշտոնները, եւ մենք կունենանք բյուրոկրատիայից զերծ պետություն»,-հայտարարեց Հայրիկյանը: Նրա համոզմամբ` երկրում անհրաժեշտ է այնպիսի պայմաններ ստեղծել, որպեսզի մարդիկ դառնան իրավիճակի տերը:
