նախընտրելի դարձնելՀայաստանի գյուղատնտեսության նախարար Սերգո Կարապետյանն այսօր՝ մարտի 15-ին, ընդունել է Հայաստանում Հնդկաստանի դեսպան Սուրեշ Բաբուին:
ՀՀ գյուղատնտեսության նախարարը ողջունել եւ շնորհավորել է դեսպանին դիվանագիտական առաքելության ստանձնման կապակցությամբ եւ նրան մաղթել է բեղմնավոր աշխատանք: Հանդիպման սկզբում կողմերն անդրադարձել են երկու երկրների ժողովուրդների միջեւ հաստատված փոխադարձ հարգանքին եւ բարեկամությանը` նշելով գյուղատնտեսության բնագավառում երկկողմ համագործակցությունն ավելի սերտացնելու եւ խորացնելու անհրաժեշտությունը:
Նախարար Սերգո Կարապետյանն անդրադարձել է գյուղատնտեսության բնագավառում հայ-հնդկական համագործակցության ընթացքում նախկինում իրականացված առավել արդյունավետ ծրագրերին, հատկապես` Հնդկաստանի կառավարության կողմից Հայաստանի Հանրապետությանն անհատույց տրամադրած 300 տրակտորներին, Հնդկաստանում հայկական ծիրանի այգու հիմնմանն ու հայ մասնագետների վերապատրաստմանը Հնդկաստանում:
Այնուհետեւ ՀՀ գյուղատնտեսության նախարարը հակիրճ ներկայացրել է գյուղատնտեսության ներկա վիճակը եւ ՀՀ կառավարության կողմից իրականացվող այն ծրագրերը, որոնց արդյունքնում հնարավոր է եղել գյուղատնտեսության ոլորտում արձանագրել 9.5 % աճ:
Շնորհակալություն հայտնելով ընդունելության համար` Բաբուն նշել է, որ պաշտոնավարության կարճ ժամանակահատվածում հնարավորություն է ունեցել ուսումնասիրելու Հայաստանի գյուղատնտեսությունը եւ նույնպես հնարավոր է համարում, այս ոլորտում երկկողմ համագործակցության զարգացումը:
Դեսպանը նախարարին տեղեկացրել է, որ հնդկակական կողմն ուսումնասիրել է Հայաստանում գյուղատնտեսական համատարած հաշվառման անցկացման աշխատանքներում հնդկակական կողմի հնարավոր մասնակցությունը եւ նշել է, որ Հնդկաստանի տեղեկատվական տեխնոլոգիաների նախարարությունը պատրաստակամություն է հայտնել ցուցաբերել տեխնիկական եւ մասնագիտական աջակցություն այդ գործընթացին` հատկապես, որ վերջիններս ներգրաված են եղել Հայաստանում 2011 թվականին անցկացված մարդահամարի աշխատանքներին:
Դեսպանն առաջարկել է նամակով դիմել այն ծրագրերի մասին , որոնցում ակնկալվում է Հնդկաստանի կառավարության աջակցությունը , ստացված առաջարկությունները դեսպանը կքննարկի Հնդկաստանի կառավարության հետ եւ կտեղեկացնի հնարավոր աջակցության մասին:
Զրուցակիցներն անդրադարձել են նաեւ գյուղատնտեսական հումքի վերամշակման արդյունաբերության բնագավառում համատեղ ձեռնարկությունների ստեղծման հնարավորությունների ուսումնասիրմանը` մասնավորապես կարտոֆիլի եւ կաթնամթերքի վերամշակման ոլորտում:
Նախարարը հանդիպման ավարտին ընդգծել է երկու երկրների գյուղատնտեսության նախարարությունների միջեւ համաձայնագիր ստորագրելու անհրաժեշտությունը:
