ՆախընտրելիԱրարատի մարզպետ Էդիկ Բարսեղյանը եւ ԱԺ ՀՀԿ խմբակցության պատգամավոր Մուրադ Մուրադյանը հերքում են լրատվամիջոցներում տարածված տեղեկությունները, թե մարզպետը պաշտոնանկ կարվի եւ նրա փոխարեն կնշանակվի պատգամավորը: Էդիկ Բարսեղյանը NEWS.am-ի թղթակցի հետ զրույցում ասաց, որ այդ մասին իմացել է լրատվամիջովներից, նման հարց չի քննարկվել կուսակցությունում, իրեն որեւէ բան չեն ասել: Հարցին, թե պատրա՞ստ եք պաշտոնանկության, նա պատասխանեց, որ այդ պաշտոնն իր տնից չի բերել եւ ինքը չի դա որոշում, այլ հանրապետության նախագահը, կառավարությունը եւ վարչապետը:
Իսկ պատգամավոր Մուրադ Մուրադյանը NEWS.am-ի թղթակցի հետ զրույցում ասաց, որ ընդհանրապես նման բան չկա, իր մասին նման կեղծ լուրեր տարածելու պատվեր են տալիս սրիկաները եւ սողունները: Ըստ որում` պատգամավորը շեշտեց, որ սա առաջին դեպքը չէ, երբ իր մասին սուտ լուրեր են տարածվում: «Գրեցին բիզնեսներ ունեմ, հրաժարվում եմ, ի՞նչ բիզնեսից եմ հրաժարվում, հիմարի նմա՞ն եմ` բիզնես ունենամ, հրաժարվեմ: Գրեցին բենզալցակայան ունեմ, ո՞ւր է բենզալցակայանը, գոնե տվեք,գրեք: Գրել են, թե իբր նախարար ժամանակ ասել են ֆաքսը եկել է, ասել եմ` ֆաքսին սուրճ հյուրասիրեք, ապուշություն, ինչ ստորություն: Նախ, իրեն հարգող նախարարը ոչ մեկին ընդունարանում սուրճ չի հյուրասիրի, եթե մտերիմ է, ուզում ես հյուրասիրես, նախ ընդունարանում խի՞ ես հյուրասիրում իրեն: Էն օրն էլ գրել են, թե իբր հայտարարագրում 85 միլիոն ունեմ, սեփական ավտո չունեմ»,- մասնավորապես նշեց նա:
Իսկ թե որ սրիկաները եւ սողուններն են իր դեմ նման պատվերներ տալիս, ապա պատգամավորը նրանց գիտի, քանի որ չի կարող ապացուցել, դրա համար չի բարձրաձայնում, «բայց մի օր դրանց գլուխը ջարդելու է, սաղին պիտի պատասխանատվության ենթարկել օրենքի առաջ»: Նա ենթադրում է, որ իր դեմ պատվերներ են տալիս իր թշնամիները, «շատերը վառված են»: Խոսելով իր եւ Կառավարության խնդիրների մասին` պատգամավորն ասաց, որ չի թաքցնում իր հակասությունը Կառավարության հետ, պատերի տակ չի խոսում, իրականում իր խնդիրը վարչապետի հետ է, իսկ կառավարության շատ անդամների հետ ջերմ, նորմալ հարաբերությունների մեջ է: «Իրենք լավ գիտեն իմ վերաբերմունքը իրենց նկատմամբ, վարչապետի նկատմամբ»,- ասաց Մուրադ Մուրադյանը:
Նշենք, որ «Հրապարակը» գրել էր, թե ընտրությունների արդյունքներով պայմանավորված, մարզպետների հրաժարականների շարքն առայժմ սահմանափակվեց Շիրակի մարզպետ Աշոտ Գիզիրյանով, թեեւ շատերին էր սպասվում նույն ճակատագիրը: Պարզվում է, սակայն, մարզպետների հարցը դեռ օրակարգում է, պարզապես դրան որոշել են անդրադառնալ երդմնակալությունից հետո: Խոսվում է, որ Գիզիրյանին կհաջորդի Արարատի մարզպետ Էդիկ Բարսեղյանը՝ Լոնդիկը: Անգամ հայտնի է նրան փոխարինողի անունը՝ ՀՀԿ-ական, բռնցքամարտիկի հակումներ ունեցող, Մասիսից մեծամասնականով պատգամավոր ընտրված Մուրադ Մուրադյանը, որը վերջերս հակասություններ ուներ կառավարության հետ, քանի որ խոչընդոտել էին ՀԷԿ կառուցելու նրա ծրագիրը: Խոսակցություններ կան, որ մարզպետի պաշտոնի համար պատգամավորը հարկադրված է որոշակի բիզնես զոհողությունների գնալ՝ հրաժարվել սեփական լճերից եւ ՀԷԿ կառուցելու մտադրությունից, որպեսզի պաշտոնն ստանձնելիս խոցելի չլինի:
