նախընտրելի դարձնելԵրեւանի ընտրություններին ընդառաջ «Մենք ենք այս քաղաքի տերը» քաղաքացիական նախաձեռնությունը նշում է, որ Երեւանի ավագանու թեկնածու քաղաքական ուժերից մեկն ամբողջությամբ եւ նույնությամբ որպես նախընտրական ծրագիր հրապարակել է նախաձեռնության 20 պահանջների ցանկը (սեպտեմբեր 2012): Իսկ մյուս կուսակցություններն էլ իրենց ծրագրերում ներառել են այդ պահանջներին համահունչ մի շարք կետեր: Որոշ ծրագրեր էլ ընդհանրապես կտրված են Երեւանի իրական խնդիրների համար մղվող քաղաքացիական խմբերի պայքարի օրակարգից:
«Մենք ենք այս քաղաքի տերը» քաղաքացիական նախաձեռնությունը կրկին ներկայացնում է նշված պահանջների ցանկը եւ նշում, որ հետագայում ակնկալում է այդ պահանջների լիարժեք կատարում եւ հաշվետվություն քաղաքացիների եւ քաղաքացիական խմբերի առջեւ:
«Հանրայինը` հանրությանը. ամբողջ Երեւանը պետք է Մաշտոցի պուրակ դառնա
Պաշտոնյաների անօրինական որոշումներն ու կոռուպցիան խժռում են Երեւանի հանրային տարածքներն ու ոչնչացնում քաղաքային մշակույթը
«Մենք ենք այս քաղաքի տերը» նախաձեռնությունը անհետաձգելի առաջարկ-պահանջներ է ներկայացնում` Երեւանի քաղաքապետարանին եւ էկոլոգիական հանձնաժողովին (բոլոր փաստերը եւ առաջարկները հավաքվել են բացառապես քաղաքացիների ջանքերով, որոնք ստիպված են պաշտպանել հանրային տարածքը պաշտոնյաների փոխարեն)
Մաշտոցի պուրակը քաղաքացիների համառ պայքարի գնով պաշտպանելուց եւ, հակառակ մասնավոր ու բիզնես շահերին, այդ պուրակը հանրությանը վերադարձնելուց հետո, անհրաժեշտ է, որ երեւանցիները ամենուր տեր կանգնեն իրենց բակերին, հանրային զբոսայգիներին եւ մասնակցեն դրանց վերաբերվող բոլոր որոշումների ընդունմանը:
Ելնելով ստորեւ թվարկված եւ լուսանկարված այն հարյուրավոր խախտումներից, որոնք արձանագրվել են ակտիվ քաղաքացիների կողմից, «Մենք ենք այս քաղաքի տերը» նախաձեռնությունը ներկայացնում է հետեւյալ առաջարկ-պահանջների ցանկը` Երեւանի քաղաքային մշակույթի մաս կազմող հանրային տարածքները պահպանելու եւ քաղաքին սպառնացող էկոլոգիական աղետը կանխելու համար:
Ելնելով այն իրողություններից, որ.
- Երեւանում հանրային զբոսայգիներն ու կանաչը կազմում են քաղաքաշինական նորմերով սահմանված չափի ընդամենը 20 տոկոսը, շարունակում են նվազել եւ քաղաքում այլեւս բավարար թթվածին չի արտադրվում այդ կանաչ գոտիներում,
- Երեւանում քաղաքաշինական որոշումներ ընդունողներն ու պատասխանատուները, շատ հաճախ կոռուպցիոն գործարքներին եւ սեփական շահերին նախապատվություն տալով, դեռեւս չեն պահպանում ՀՀ օրենսդրությունն ու քաղաքաշինական նորմերը, ինչի արդյունքում ՀՀ շարքային քաղաքացիները ստիպված են թողնել իրենց բուն զբաղմունքն ու վազել այս կամ այն ապօրինի շինարարությունը հանրային կանաչ գոտիներում կանգնեցնելու համար,
-Երեւանում այլեւս չկան բավարար ծառեր մեր թոքերի համար թթվածին արտադրելու համար (անհրաժեշտ 21 քառ. մետրի փոխարեն մեկ շնչին բաժին է ընկնում 7 քառ. մետրից էլ քիչ կանաչ տարածք): Եթե հաշվի առնենք նաեւ քաղաքի բնակլիմայական պայմանները, ըստ որի Երեւանին բնորոշ է չոր մայրցամաքային կլիման եւ այն գտնվում է օշինդրային կիսաանապատի գոտում, առավել կարեւորվում է կանաչ տարածքների անհրաժեշտությունը՝ քամիներից պաշպանելու, օդը խոնավացնելու, փոշուց եւ թունավոր նյութերից մաքրելու համար,
- Երեւանը որպես մայրաքաղաք անցած 20 տարիների ընթացքում կորցրել է իր քաղաքային մշակույթի եւ ինքնության կարեւոր տարրերը, քանի որ հանրային կանաչ տարածքները ստորադասվել են մասնավոր տնտեսվարողների շահերին, ապա դրանք համատարած կերպով օտարվել, անխնա ոչնչացվել` խեղաթյուրելով հանրային տարածքների նպատակային նշանակությունը,
- Երեւանի եւ քաղաքի բնակիչների կենսական շահերից ելնելով` քաղաքի կանաչ եւ հանրային գոտիների օտարման հաշվին համայնքային բյուջեի համալրումը այլեւս չի կարող շարունակվել եւ վտանգի տակ է դնում Երեւանի կայուն զարգացումը:
- Երեւանի գլխավոր հատակագիծ-օրենքի շեղումները եւ կանաչ տարածքների ապօրինի կառուցապատումները հասնում են ահռելի չափերի եւ անհրաժեշտ են վճռական քայլեր Երեւանը գլխավոր հատակագծի պահանջներին համապատասխանեցնելու համար, մենք` Երեւանի շահագրգիռ բնակիչներս, ներկայիս քաղաքաշինական քաոսը կանգնեցնելու համար եւ հենվելով այս ամբողջ ընթացքում քաղաքացիների ու մասնագետների կարծիքների վրա, առաջարկում եւ պահանջում ենք Երեւանի քաղաքապետարանից կատարել հետեւյալ հիմնական քայլերը.
1. Համատարած արգելք դնել Երեւանի ամբողջ տարածքում գտնվող եւ համայնքին պատկանող բոլոր կանաչ գոտիների օտարումների վրա, ինչպես նաեւ այլեւս աճուրդներ չանցկացնել այդ հողերն օտարելու համար, դրանց մի մասը հայտարարել արգելոցային գոտիներ,
2. Ավագանու առաջիկա նիստերին կրկնապատկել 2013 թվականի Երեւանի բյուջեում կանաչ տարածքների համար հատկացվող գումարը, բայց փոխել այդ միջոցները ծախսելու փիլիսոփայությունը. դրանք ծախսել ոչ թե կարճաժամկետ գեղեցկացման, այլ երկարատեւ էկոլոգիական վերականգնման եւ ծառաշատ գոտիների տեւական խնամքի վրա,
3. Մաշտոցի պուրակի օրինակով Երեւանի բոլոր մյուս հանրային այգիները ու պուրակները բարեկարգել համայնքային միջոցներով եւ բացառել դրանցում սրճարանների եւ հատկապես բետոնե կառույցների տեղադրումը,
4. Ցանկացած մեծ ու փոքր քաղաքաշինական որոշումից եւ հողահատկացումից առաջ քաղաքապետարանի կողմից ակտիվ իրազեկել տվյալ տարածքի բնակչությանը եւ կազմակերպել հանրային լսումներ տվյալ նախագծի շուրջ,
5. Հանրային զբոսայգիներում մասնավոր ընկերությունների հետ բարեկարգման եւ շահագործման պայմանագիր կնքել միայն այն դեպքում, եթե մասնավորը հանրության հետ կհամաձայնեցնի առաջարկվող նախագիծը եւ կպարտավորվի զբոսայգին շահագործել Երեւանի համայնքի հետ պայմանագրով ամրագրված խիստ կանոնների համաձայն, որոնք կպահպանեն այգու նպատակային նշանակությունը,
6. Ծաղիկապատման գործողություններից անցում կատարել առավելապես Երեւանի ծառաշատ այգիների եւ պուրակների խնամքի,
7. Էկոլոգիական հանձնաժողովին ներկայացնել «Կանաչապատում ՓԲԸ»-ի կողմից կատարվող բոլոր ծախսերի եւ Երեւանի բյուջեից կատարվող ծախսերի մասին մանրամասն եւ ամբողջ տեղեկատվությունը, այն թափանցիկ ու հասանելի դարձնել բոլորի համար, քանի որ խոսքը գնում է հանրային միջոցների մասին,
8. Երեւանի կենտրոնական եւ ծայրամասային զբոսայգիներն ազատել մասնավոր տնտեսվարողների կողմից կառուցված բետոնե կառույցներից, գտնել նոր լուծումներ, չերկարաձգել ավարտվող պայմանագրերը, խզել այն պայմանագրերը, որոնց դեպքում դա հնարավոր է,
9. Հնարավորինս հանրությանը ետ վերադարձնել նախկինում 90-ականներին եւ 2000-ականներին Գլխավոր հատակագծի խախտումներով կամ ապօրինաբար օտարված մեծամասշտաբ կանաչ տարածքները,
10. Առաջնահերթ դադարեցնել որեւէ կառուցապատում եւ վերականգնել հետեւյալ տարածքները. Նորքի անտառից մնացած հատված, Մոնումենտի անտառից մնացած հատված, Ավանի հին եւ նոր հատվածների միջեւ գտնվող անտառածածկ գոտի, Դալմայի այգիները` մշակելով դրանց համար հատուկ պահպանման ծրագրեր,
11. Սահմանազատել Կենտրոնի եւ մյուս վարչական շրջանների միջեւ մնացած մեծ անտառածածկ հատվածները եւ դրանք հայտարարել անձեռնմխելի հանրային կանաչ գոտիներ,
12. Ստուգել եւ բացահայտել նախկինում ապօրինաբար սեփականաշնորհված հանրային կանաչ տարածքների, այգիների եւ պուրակների մասին որոշումների օրինականությունը եւ ապօրինության մասին հիմքերի առկայության դեպքում իրավական քայլեր ձեռնարկել դրանց իրավական կարգավիճակը հստակեցնելու համար,
13. Վերջ դնել այն արատավոր պրակտիկային, ըստ որի հանրային պուրակների որոշակի տոկոս կառուցապատման թույլտվությունից հետո նույն չափով կրկին կառուցապատվում է մնացած այգին, ինչի արդյունքում արդեն իսկ ոչնչացվել են Երեւանի մեծածավալ հանրային այգիներ եւ պուրակներ,
14. Հանրային զբոսայգիները բարեկարգել համայնքային միջոցներով, իսկ մասնավոր ներդրողների կամ արդեն սեփականաշնորհված կամ վարձակալության տրված, բայց հանրության կողմից օգտագործվող կանաչ գոտիների համար սահմանել օգտագործման հատուկ կանոններ,
15. Ստեղծել Երեւանի վարչական շրջանների կանաչ գոտիները եւ այգիները միացնող անընդհատական հետիոտն ճանապարհներ` հետիոտն եւ հեծանվային ընթացքի անխափան շարժման համար,
16. Մաշտոցի պուրակի օրինակով բարեկարգել նաեւ պողոտայի աջ կողմում գտնվող պուրակը, այն լիարժեք պահպանելով իր ամբողջ տարածքի սահմաններում, ինչը նախատեսված է Գլխավոր հատակագծում, նույնը կիրառել Երեւանի մյուս հանրային զբոսայգիների անխնամ հատվածների նկատմամբ,
17. Երեւանի գլխավոր ճարտարապետին զերծ պահել սեփական ստեղծագործական նախագծերի իրականացումից, այդ նպատակով պաշտոնի չարաշահումից ու շահերի բախումից, եւ գլխավոր ճարտարապետին վերապահել բացառապես հսկողությունը քաղաքաշինական օրենքների պահպանման նկատմամբ եւ օրենքով սահմանված մյուս գործառույթները,
18. Հրավիրել բոլոր ճարտարապետական գրասենյակներին կամավոր եւ սեփական նախաձեռնությամբ մրցույթներ իրականացնելու Երեւանի տարբեր հանրային գոտիների համար յուրօրինակ նախագծումների համար եւ ապահովել ազատ եւ արդար մրցակցությունը ճարտարապետների համար, ինչպես նաեւ հանրության մասնակցությունը այդ քննարկումներին,
19. Բոլոր քաղաքաշինական որոշումներն ընդունելիս ղեկավարվել բացառապես Երեւանի գլխավոր հատակագիծ-օրենքով եւ շտկել նախկինում թույլ տրված շեղումներն ու սխալ կառուցապատումները, դադարեցնել ապօրինի կառույցների օրինականացման գործընթացը,
20. Կատարել օրենսդրական փոփոխություններ մասնավորապես վարչական օրինախախտումների, քաղաքաշինական նորմերի եւ պետական մարմինների միջեւ լիազորությունների ավելի արդյունավետ բաժանման ոլորտում: Սահմանել առավել խիստ շինարարական նորմեր, ըստ որոնց շինարարության ժամանակ հատուկ պաշտպանություն կապահովվի շինհրապարակում գտնվող ծառերի եւ կանաչ տարածքի հանդեպ,
21. Առաջնորդվել Երեւանում որպես մայրաքաղաք լայնարձակ զբոսայգիներ եւ մեծածավալ ծառածածկ վերականգնողական ու հանգստի գոտիներ ստեղծելու քաղաքականությամբ եւ Ալեքսանդր Թամանյանի «Քաղաք-այգի» հայեցակարգ-տեսլականով,
22. Քաղաքացու լիարժեք մասնակցությունը ապահովելու համար` հետեւել «Քաղաքաշինության մասին» ՀՀ օրենքի 6-րդ գլխի դրույթների պահպանմանը,
23. Վերը նշված մոտեցումներն ու սկզբունքները ամրագրել Երեւանի քաղաքապետի եւ ավագանու որոշումներում:
Համառոտ ձեւակերպելով մեր առաջարկները, դրանք իրենցից ներկայացնում են հետեւյալը. քաղաքացիների կողմից լիարժեք եւ իրական հսկողություն, հանրային տարածքի խնամք համայնքի միջոցներով, հանրային տարածքների ֆունկցիոնալ նշանակության պահպանում եւ հանրության իրական մասնակցություն քաղաքաշինական բոլոր որոշումներից առաջ, ինչպես նաեւ հանրային միջոցների ծախսման թափանցիկություն»:
