Երեւանի քաղաքապետ Տարոն Մարգարյանն այցելել է Էրեբունի հնավայր, շրջել Էրեբունի ամրոցի միջնաբերդում, ծանոթացել հնավայրի վերականգնման, ինչպես նաեւ թանգարանի արդիականացման ու այցելուների սպասարկման բարելավման ներդրումային ծրագրին։

Հավաք ծրագրում ընդգրկված են Էրեբունի հնավայրի պահպանությանը եւ թանգարանի արդյունավետ կառավարմանն անհրաժեշտ  առաջնահերթություններ, ինչպիսիք են Միջնաբերդի հանդիպակաց բլրի լանջին ամֆիթատրոնի կառուցումը (լուսաձայնային սեզոնային ներկայացման միջոցով քաղաքի հիմնադրման, քաղաքային կյանքի եւ քաղաքի կործանման պատմությունն այցելուի համար մեկնաբանելու նպատակով), հնավայրի ցանկապատումը, ամրոցի պատերի փլուզված հատվածների մասնակի վերականգնումն ու ամրակայումը, Խալդ աստծո տաճարի եւ կից պաշտամունքային աշտարակի վերականգնումը, որմնանկարների տեղադրումը, Կարասային սրահի մի հատվածի վերականգնումը եւ այլն։

Ծանոթանալով ծրագրին՝ Երեւանի քաղաքապետ Տարոն Մարգարյանը նշել է, որ նման մեծածավալ ծրագրի իրականացումը լիովին իրատեսական է քաղաքապետարան-մասնավոր հատված համագործակցությամբ, եւ որ Երեւանի քաղաքապետարանը պատրաստ է քննարկել ներդրումային ցանկացած առաջարկ, որը նպաստավոր կլինի հնավայրի տեւական պահպանության համար։

Երեւանի քաղաքապետին են ներկայացվել նաեւ Էրեբունի ամրոցի միջնաբերդում  ու թանգարանում դեռեւս նախորդ տարի իրականացված բազմաբնույթ ծրագրերի արդյունքները, որոնցից են թեքահարթակների կառուցումը, «Պատանի հնագետ» դպրոցի հիմնումը, Էրեբունի ամրոցի միջնաբերդի եւ հարակից տարածքի գիշերային լուսավորության ապահովումը եւ այլն։ Ներկայում թանգարանի շենքում ընթացքի մեջ են ջերմախոնավային համակարգի  տեղադրման աշխատանքները։