ՆախընտրելիՕրերս ՀՀ մարդու իրավունքների պաշտպանի աշխատակազմի Շիրակի տարածքային գրասենյակի նախաձեռնությամբ կազմակերպվել է հանդիպում Գյումրիում գործող հաշմանդամություն ունեցող անձանց խնդիրներով զբաղվող 12 հասարակական կազմակերպությունների ներկայացուցիչների հետ: Ոլորտում առկա խնդիրները բարձրաձայնելու եւ առավել արդյունավետ լուծելու նպատակով այդ կազմակերպությունները ստեղծել են հատուկ խորհուրդ, որի հետ նաեւ այսուհետ համագործակցելու է Պաշտպանի աշխատակազմը:
Քննարկման ժամանակ բարձրացվել են մի շարք խնդիրներ, որոնք վերաբերում էին հաշմանդամություն ունեցող մարդկանց պետպատվերի շրջանակներում բուժօգնություն ստանալուն, անվճար դեղորայքի, սայլակների եւ քայլակների տրամադրմանը, շենքերի եւ շինությունների անմատչելիությանը` այդ թվում թեքահարթակների բացակայության, կամ առկա թեքահարթակների անհարմարությանը եւ հաշմանդամություն ունեցող մարդկանց կյանքը արհեստականորեն դժվարեցնող մի շարք այլ հարցերին:
Հանդիպման ընթացքում ներկաներն իրենց կարծիքներն են հայտնել նաեւ «Հաշմանդամություն ունեցող անձանց իրավունքների պաշտպանության եւ սոցիալական ներառման մասին» ՀՀ օրենքի նախագծի վերաբերյալ՝ համարելով, որ այն չի ապահովում արդյունավետ մեխանիզմներ՝ պաշտպանելու համար հաշմանդամություն ունեցող անձանց իրավունքները եւ կանխելու համար խտրականությունն իրենց նկատմամբ:
Հետագայում կկազմակերպվեն մի շարք այլ հանդիպումներ եւ ավելի մանրամասն կքննարկվեն հաշմանդամություն ունեցող անձանց վերաբերող առանձին խնդիրներ:
