ՆախընտրելիԼիբիայի պաշտպանության նախարար Մոհամեդ ալ Բարգատին հրաժարական է տվել: Այդկերպ նախարարն իր բողոքն է արտահայտել քաղաքական կյանքում երկրի նախկին նախագահ Մուամար Քադաֆիի համակիրների մասնակցությունը սահմանափակող օրենքի ընդունման դեմ:
«Ես երբեք չեմ կարողանա ընդունել այն, որ քաղաքական որոշումները կայացվեն զենքի ուժով…Դա բռնություն է ժողովրդավարության դեմ, որը ես երդվել եմ պաշտպանել», - ալ Բարգատիի խոսքերն է մեջբերում Reuters-ը:
Հիշեցնենք, որ ապրիլի 28-ից հարյուրավոր զինված մարդիկ մեկ շաբաթ շրջափակել էին Լիբիայի ԱԳՆ-ի եւ ՆԳՆ-ի շենքերը: Նրանք պահանջում էին իշխանությունից հեռացնել Քադաֆիի նախկին համակիրներին եւ աշխատանքով ապահովել ջամահիրիայի ղեկավարի տապալմանը մասնակցած զինծառայողներին:
Մայիսի 6-ի գիշերը Լիբիայի լրատվամիջոցները հայտնել էին, որ իշխանությունները քաղաքական կյանքում նախկին վարչակարգի համակիրների մասնակցությունը սահմանափակող օրենք են ընդունել, ինչպես նաեւ խոստացել էին բավարարել ցուցարարների մյուս պահանջները: Սակայն մայիսի 6-ին բողոքողները նորից էին շրջափակել կառավարական շենքերը: Նրանք պահանջում էին Լիբիայի վարչապետ Ալի Զեյդանի հրաժարականը, գրում է «Մոսկովսկի կոմսոմոլեցը»:
