ՀՀՇ նախկին անդամներ Ալեքսանդր Արզումանյանը, Արարատ Զուրաբյանը, Հովհաննես Իգիթյանն ու Կարապետ Ռուբինյանը հանդես են եկել հայտարարությամբ, որտեղ նշում են, որ հպարտանում են 25 տարվա ՀՀՇ-ի քաղաքական գործունեությամբ եւ մտադիր են վերագրանցել կուսակցությունը:

Հայտարարությունում ասվում է.

«2013 թվականի փետրվարի 23-ին ավարտին հասցվեց Հայոց Համազգային Շարժում կուսակցության կազմաքանդման գործընթացը, որը հետեւողականորեն իրականացվում էր տեւական ժամանակ: Անվանափոխման պատրվակով, ըստ էության, դադարեցվեց Ղարաբաղյան փառահեղ շարժմամբ ծնունդ առած, Հայաստանի Երրորդ հանրապետության ակունքներում կանգնած, Հայաստանում ժողովրդավարության եւ ազատականության ջահակիր Հայոց Համազգային Շարժում կուսակցության գործունեությունը:

Հանդիսանալով Հայոց Համազգային Շարժման ակտիվ մասնակիցներ շարժման առաջին իսկ օրերից, լինելով ՀՀՇ կուսակցության հիմնադիր անդամներ, հավատարիմ մնալով ժողովրդավարության ու ազատականության արժեքներին, մեր անհամաձայնությունն ենք արտահայտել ՀՀՇ-ն քաղաքական ասպարեզից վտարելու, արհեստածին միավորով այն քողարկելու եւ ստվերելու փորձին, դա համարելով հրաժարում որդեգրած գաղափարախոսությունից ու սկզբունքներից եւ ոտնձգություն մերօրյա պատմության դեմ:

Այս երեւույթի, ինչպես նաեւ վերջին մի քանի տարիներին կուսակցության ներքին ժողովրդավարության խաթարման եւ անձնապաշտական մթնոլորտի արմատավորման պատճառով բազմաթիվ սկզբունքային կուսակցականներ դուրս են մղվել ՀՀՇ-ից:

Մենք՝ ներքոստորագրյալներս, հպարտանում ենք 25 տարվա մեր քաղաքական գործունեությամբ, անցած քառորդ դարում Հայոց Համազգային Շարժման գրանցած նվաճումների ու հաջողությունների մեջ մեր համեստ ներդրումով եւ ցավ ենք զգում մեր կորուստների ու ձախողումների համար:

Մենք պատճառ չունենք ամաչելու մեր անցյալից: Մեր նպատակն է՝ վերագրանցելով կուսակցությունը եւ պահպանելով ՀՀՇ պատմական անունը, առաջնորդվելով ժողովրդավարության, կոլեգիալ կառավարման, գործունեության լիակատար թափանցիկության սկզբունքներով, վերականգնել Սահմանադրական կարգը Հայաստանի Հանրապետությունում, հասնել ժողովրդավարության եւ ազատական արժեքների հաստատմանը:

Ալեքսանդր Արզումանյան

Արարատ Զուրաբյան

Հովհաննես Իգիթյան

Կարապետ Ռուբինյան