Ընթացիկ տարվա առաջին եռամսյակում  ոչ առեւտրային բնույթի տրանսֆերտների արտաքին ծավալն անցած տարվա նույն  ժամանակահատվածի  համեմատ աճել է ավելի քան 28,2 մլն դոլարով եւ կազմել գրեթե 305,5 մլն դոլար: Աճի տեմպը կազմել է 10,2%:

Ինչպես անցած տարի, տրանսֆերտների առյուծի բաժինը`80,8%, ստացվում է Ռուսաստանից: Սակայն այն պատճառով, որ այդ երկրից գումարային փոխանցումների աճի տեմպը 0,3 տոկոսային կետով զիջել է միջին ցուցանիշին,  տրանսֆերտների ընդհանուր ծավալի մեջ նրա տեսակարար կշիռը նվազել է 0,2%-ով` բացարձակ թվով  22,1 մլն դոլար:

Անսպասելի թռիչք է արձանագրվել «անհայտ» երկրների խմբում, որը ԿԲ փաստաթղթերում ներկայացված է որպես «այլ»: Արդյունքում տրանսֆերտների ընդհանուր ծավալում այդ մասնաբաժինն ավելացել է 0,8 տոկոսային կետով` առաջին եռամսյակում կազմելով 7,4%:

Միաժամանակ տրանսֆերտների ծավալում ավանդաբար երկրորդ տեղն զբաղեցնող ԱՄՆ-ից ծավալը  կրճատվել է 1,3 մլն դոլարով կամ 6,8%-ով:

Ավելացնենք, որ հաշվետու եռամսյակում տրանսֆերտների ծավալը դրամով կազմել է 125,1 մլրդ` նախորդ տարվա նույն ժամանակահատվածի համեմատ  17,4 մլրդ դրամով ավելի: Երկրի սպառողական շուկայում տրանսֆերտների դերի մասին շատ է խոսվել:

 

Ինչպես երեւում է վերը ներկայացված գծապատկերից, տրանսֆերտների սալդոյի գծի ու «մաքուր» ներմուծման ուղղությունները համընկնում են: Հասկանալի է, որ երկու ցուցանիշներն ընդհանուր տնտեսական գործոնների ազդեցության արդյունք են, ինչպես ներքին, այնպես էլ արտաքին: Միաժամանակ` տրանսֆերտները կրկնակի ազդեցություն են ունենում ապրանքի արտահանման վրա: Մի կողմից` տրանսֆերտների հոսքը հանգեցնում է  բնակչության գնողունակության բարձրացմանը, մյուս կողմից`  ներմուծողներն ստանում են արտաքին առեւտրի գործարքների համար անհրաժեշտ արտարժույթը: Հասկանալի է, որ առանց տրանսֆերտների` արտարժույթի շուկայում դոլարի ծավալն անհամեմատ ավելի պակաս կլիներ:

 

Ուսումնասիրվող ժամանակահատվածում տրանսֆերտների դրական սալդոյի եւ «մաքուր» ներմուծման միջեւ հարաբերակցությունն ամենաբարձրը եղել է 2006թ-ին` 62%, այնուհետեւ ճգնաժամային  2009 թվականին հասել է նվազգույնի` 36%: Ինչպես  Հայաստանի, այնպես էլ Ռուսաստանի` ճգնաժամից դուրս գալու ընթացքով պայմանավորված` նշված հարաբերակցությունը նորից  սկսել է աճել` անցած տարի հասնելով մինչեւ 49%-ի:

Այդ  երկու ցուցանիշների համադրությունը ուսումնասիրվող ժամանակահատվածում  հասել է 0,9-ի,  ինչը ենթադրում է տրանսֆերտի սալդոյի բավականին բարձր ազդեցության աստիճան` Հայաստանի «մաքուր»  ներմուծման  դինամիկայի վրա:

Ալբերտ Խաչատրյան