նախընտրելի դարձնելԹուրքիայի ԱԳՆ-ն հանդես է եկել Հայոց ցեղասպանության մասին Հռոմի պապի խոսքերի վերաբերյալ հայտարարությամբ:
Ըստ թուրքական «Today’s Zaman»-ի` հայտարարության մեջ ասվում է, որ պապը պետք է նպաստի երկրում խաղաղությանը, այլ ոչ թե պատմական խնդիրներ բարձրացնի: ԱԳՆ-ում իրենց հիասթափությունն են հայտնել` պապի հայտարարությունն անվանելով միակողմանի:
Ավելի վաղ Հռոմի պապը Հայոց ցեղասպանության 100-ամյա տարելիցի կապակցությամբ Հայաստան այցելելու եւ Երեւանում հոգեւոր արարողություն անցկացնելու ցանկություն էր հայտնել:
Գերատեսչության հայտարարությունում նաեւ ասվում է, որ Անկարայում Վատիկանի դեսպան Անտոնիո Լուչիբելոն ԱԳՆ է հրավիրվել: Հանդիպման ընթացքում թուրքական կողմը հայտնել է պապի հայտարարության հետ կապված դժգոհությունը:
Հիշեցնենք, որ Վատիկանում Հայաստանի առաջին դեսպանը Միքայել Մինասյանն է, որը հունիսի 7-ին հավատարմագրեր է հանձնել Հռոմի պապի Ֆրանցիսկոսին: Հանդիպման ընթացքում Մինասյանը պապին փոխանցել է նախագահ Սերժ Սարգսյանի՝ Հայաստան այցելելու հրավերը: Հռոմի պապը խոստացել է դիտարկել Հայաստան այցելելու հնարավորությունը:
