Իսրայելի նախագահ Շիմոն Պերեսը եւ Վրաստանի վարչապետ Բիձինա Իվանիշվիլին պայմանավորվել են ընդլայնել երկու երկրների միջեւ  «ռազմավարական հարաբերությունները»:

Վրաստանի վարչապետը երկու երկրների միջեւ հարաբերությունների ճգնաժամից հետո դարձել է Երուսաղեմ այցելած վրացի ամենաբարձրաստիճան պաշտոնյան։ Հարաբերությունների սրման  պատճառը 2010թ. Վրաստանում իսրայելցի երկու գործարարների ձերբակալությունն էր, նշում է «ՌԻԱ Նովոստին»:

Պերեսն Իվանիշվիլիին ասել է. «Դուք հրեա ժողովրդի իսկական բարեկամն եք»: Իվանիշվիլին, խոստովանելով Իսրայելի եւ հրեա ժողովրդի նկատմամբ «տածած հատուկ հարգանքը», իսրայելցիներին  մաղթել է  «վաստակած խաղաղություն»: «Դրանից հետո երկու առաջնորդներն  էլ համաձայնել են երկու երկրների միջեւ ռազմավարական հարաբերությունների ընդլայնման եւ ամրապնդման անհրաժեշտության հարցում», - ասված է Իսրայելի նախագահի մամուլի ծառայության տարածած հաղորդագրության մեջ:

Վրացական պատվիրակության կազմում ընդգրկված են արտգործնախարար Մայա Փանջիկիձեն, սփյուռքի հարցերով պետնախարար Կոնստանտին Սուրգուլաձեն,  տնտեսության եւ  կայուն զարգացման նախարար Գեորգի Քվիրիկաշվիլին եւ  ներդրումային գործակալության տնօրեն Գեորգի Պերտայան: Հունիսի 25-ին նախատեսված է Իվանիշվիլիի հանդիպումը իսրայելցի իր գործընկեր Բինյամին Նեթանյահուի հետ: 

Հիշեցնենք, որ Վրաստանի վարչապետ Բիձինա Իվանիշվիլին հունիս 24-ին երկօրյա այցով ժամանել էր Իսրայել` հարաբերությունների վերականգնման համար:  Երկկողմ հարաբերություններում ճգնաժամն սկսվել էր 2010թ., երբ Վրաստանում  կաշառակերության մեղադրանքով ձերբակալվել էին իսրայելցի երկու գործարարներ:  Նրանք մեկ տարի անց համաներմամբ ազատվել էին:

Վրաստանի վարչապետը մեկնում է Իսրայել` հատուկ հարաբերություններ վերականգնելու