Սանկտ Պետերբուրգում մահացած 41-ամյա Մալխազ Նոնիաձեի ընտանիքը դատի է տալիս թուրքական Turkish Airlines ավիաընկերությանը: Մահացածի մայրը հայտնել է, որ իրենք բարոյական վնասի փոխհատուցում են պահանջելու` իրենց հարազատի մարմինը կորցնելու համար: 

Մահացածի հարազատները հուլիսի 13-ին ողջ օրը սպասել են օդանավակայանում, սակայն Թբիլիսի ժամանած Turkish Airlines-ի օդանավում Մալխազի մարմինը չի եղել: Նոնիաձեի ընտանիքի անդամները հայտնել են, որ  ավիաընկերությունը մարմինը Ստամբուլում է կորցրել, այնտեղից այն Թբիլիսիի փոխարեն Հարավային Կորեա են ուղարկել:  Ավիաընկերությունը ժխտում է այս փաստը եւ հայտնում, որ  մահացածի մարմինը գտնվում է Ստամբուլի օդանավակայանում եւ տեղ կհասցվի հուլիսի 14-ին:

«Գռուզիա  Online»-ը հայտնում է, որ Նոնիաձեի մարմինը նախօրեին Վրաստան էր հասցվել Turkish Airlines-ի Ստամբուլ-Թբիլիսի չվերթով` ուշացմամբ:

Ըստ Նոնիաձեի մոր` մարմնի տեղափոխման ծախսերը հոգացել էր Վրաստանի արտգործնախարարությունը:  Նա շնորհակալություն է հայտնել ԱԳՆ-ին եւ լրագրողներին,  որոնք օգնել են պարզել, թե իրականում որտեղ է եղել մահացածի մարմինը:

Մալխազ Նոնիաձեն Սանկտ Պետերբուրգում շինարարությունում էր աշխատում եւ ըստ բժիշկների պաշտոնական եզրակացության` վախճանվել է սրտի կաթվածից: Ընտանիքը դրան չի հավատում: