«ԱրմենՏել» ընկերությունը (ապրանքանիշը՝ Beeline) շարունակում է համագործակցել «Գործարարության զարգացման եւ օժանդակության կենտրոն» հասարակական կազմակերպության հետ Վանաձորի տարածաշրջանային համակարգչային կենտրոնին աջակցելու նպատակով:

Դեռեւս 2009 թվականին մեկնարկած ծրագրի շրջանակում զգալիորեն ընդլայնվել է կենտրոնի գործնեությունը: Մասնավորապես, ծրագրավորման հիմունքների դասընթացներին զուգահեռ, 2013 թվականի հունվարից մեկնարկել է նաեւ «Պատանի տեխնիկ» նախագիծը: Ծրագրի նպատակն է հնարավորություն ընձեռել բոլոր ցանկացողներին ստանալ գործնական հմտություններ թվային տեխնոլոգիաների հետ աշխատելիս:

«Պատանի տեխնիկ» խմբակը վարում է բարձրակարգ մասնագետ, «Հայստանի Ինտերնետ Հասարակություն» ՀԿ-ի  (ISOC.AM) անդամ Վահան Միսակյանը, իսկ  նախագծի ղեկավարն է մի շարք զարգացման ծրագրերի հեղինակ Մարգարիտա Սոլոմոնյանը, ով նույնպես հանդիսանում է ISOC.AM անդամ:

«Բարձրորակ կրթություն ստանալը առանց համակարգչային հմտությունների ժամանակակից աշխարհում գրեթե անհնար է: Թվային տեխնոլոգիաները դարձել են մեր կյանքի անաբաժանելի մասը. անհրաժեշտ պայման ուսուման գործընթացում, աշխատանքում եւ շփման մեջ: «ԱրմենՏել» ընկերությունը շարունակում է զբաղեցնել առաջատար դիրքեր Ինտերնետ ծառայությունների շուկայում, եւ որպես սոցիալապես պատասխանատու օպերատոր` մենք ձգտում ենք ժամանակակից տեխնոլոգիաները դարձնել հասանելի ոչ միայն մայրաքաղաքի, այլ նաեւ մարզերի բնակիչների համար, անկախ նրանց բնակության վայրից», - ասել է «ԱրմենՏել» ընկերության Գլխավոր տնօրեն Անդրեյ Պյատախինը:

«ԱրմենՏել»-ի բազմամյա աջակցությունը հանդիսանում է բաձր գնահատական եւ երաշխիք երկարաժամկետ, իրական եւ  տրամաբանորեն հիմնավորված նախագծերի, որոնց նպատակն է օգնել երիտասարդներին մասնագիտական կողմնորոշման հարցում, ինչպես նաեւ հնարավորություն ընձեռել նրանց ձեռք բերել մասնագիտական հմտություններ եւ ամենակարեւորը կիրառել դրանք Վանաձորում գործող ձեռնարկություններում»,- նշել է «Գործարարության զարգացման եւ օժանդակության կենտրոն» հասարակական կազմակերպության նախագահ Ռազմիկ Սոլոմոնյանը:

Նշենք, որ «Գործարարության զարգացման եւ օժանդակության կենտրոն» հասարակական կազմակերպությունը հիմնվել է 1995 թ. եւ տարիներ շարունակ ինտերնետ տեխնելոգիաների կիրառմամբ կազմակերպում է սեմինարներ եւ դասընթացներ` ստեղծելով  բարենպաստ միջավայր անհրաժեշտ եւ շուկայական պայմաններում պահանջված կրթություն ստանալու համար: Այս տարիների ընթացքում պատրաստվել են մի շարք տեխնիկական մասնագետներ, ովքեր ՏՏ ոլորտում կառուցել են արժանավոր կարիերա եւ մասնակցել են ԱՄՆ եւ Հնդկաստանի հետ փորձի փոխանակման ծրագրերին: