Միքայելյանի անվան վիրաբուժության կենտրոնում մահացած Արարատի քաղաքապետ Աբրահամ Բաբայանի հոգեհանգստի արարողությունը կկայանա այսօր` օգոստոսի 16-ին, երեկոյան 18.00-ին, Արարատում գտնվող նրա տանը: Իսկ քաղաքապետի թաղումը կլինի հաջորդ օրը` օգոստոսի 17-ին, ժամը 13.00:-ին Այս մասին NEWS.am-ի թղթակցի հետ զրույցում ասաց Արարատի մարզպետ Էդիկ Բարսեղյանը:

Նա նշեց, որ պարբերաբար այցելում էր Արարատի քաղաքապետին` թե վիրահատությունից առաջ, թե դրանից հետո, մահանալուց մեկ օր առաջ եւ մահանալու օրը եւս մարզպետը եղել է հիվանդանոցում, զրուցել հարազատների հետ:

Վիրահատությունից հետո մարզպետին չի հաջողվել տեսնել Աբրահամ Բաբայանին, քանի որ նա գտնվել է Վերակենդանացման բաժանմունքում, «վիրահատել են, գիտակցությունը կորցրել է եւ այլեւս գիտակցության չի եղել»: Դեպքին նախորդած գիշերը նրա վիճակը վատացել էր, ճնշումը բարձրացել էր:

Իսկ մինչ վիրահատությունը, մարզպետի խոսքով, Աբրահամ Բաբայանը նորմալ էր, տրամադրությունը նորմալ էր, լավատես էր տրամադրված, մտադիր էր ապաքինվել եւ վերադառնալ աշխատանքին:

Մարզպետը տեղեկացրեց, որ Աբրահամ Բաբայանը հունիսի սկզբից իրենից արձակուրդ էր խնդրել` բուժական նպատակներով արտերկիր մեկնելու համար, սակայն այդ ժամանակը նա իրեն թույլ չէր տվել շատ հետաքրքրվել: Դրանից հետո Աբրահամ Բաբայանը մեկնել էր Գերմանիա, վիրահատվել եւ վերադարձել էր Հայաստան: Որոշ ժամանակ իրեն լավ էր զգում, բայց հանկարծակի վատացավ նրա առողջական վիճակը: Մարզպետը շեշտեց, որ Աբրահամ Բաբայանը շատ լավ քաղաքապետ էր, քաղաքը միշտ բարեկարգված, մաքուր վիճակում էր պահում, պարտաճանաչ կատարում էր բոլոր վճարումները, օրինակելի ղեկավար է: Էդիկ Բարսեղյանը ցավակեց Աբրահամ Բաբայանի բոլոր հարազատներին, արարատցիներին նրա մահվան կապակցությամբ 

Ավելի վաղ NEWS.am-ը հայտնել էր, որ Միքայելյանի անվան վիրաբուժության կենտրոնում օգոստոսի 15-ին, առավոտյան 10.00-ի սահմաններում, մահացել է Արարատի քաղաքապետ Աբրահամ Բաբայանը: «Միքայելյան» վիրահատվել վիրաբուժության ինստիտուտի փոխտնօրեն Օնիկ Մելքոնյանը NEWS.am-ի թղթակցի հետ զրույցում ասել է, որ վերջինս իրենց մոտ ընդունվել է օգոստոսի 5-ին, նրա մոտ առկա էր գլխուղեղի ուռուցք, ինչի կապակցությամբ օգոստոսի 9-ին վիրահատել են:  «Բավականին բարդացած էր, վիճակը ծանր էր, կարծեմ` երկրորդ, թե երրորդ անգամն էր վիրահատվում, դրանից առաջ էլ Գերմանիայում էր եղել, վիրահատություն էր տարել: Վիրահատեությունից  հետո տեսել եմ, ծանր վիճակում, չէր խոսում, գիտակցության էլեմենտներ կային, բայց, դժբախտաբար,  բարդություններ են առաջացել, մահացել է»,- ասել է Օնիկ Մելքոնյանը`  հավելելով, որ փորձաքննությունը կպարզի, թե հատկապես ինչն է հանգեցրել մահվան:

Նշենք, որ Աբրահամ Սուրենի  Բաբայանը  ծնվել է 1957թ. հոկտեմբերի 21-ին  Արարատ քաղաքում: 1965թ  հաճախել  է  Արարատ քաղաքի թիվ 2-րդ դպրոցը: 1975թ. ավարտելուց հետո աշխատել է N1 շին. վարչությունում  որպես բանվոր: 1976-1978թթ ծառայել  է  խորհրդային բանակում: Սովորել եւ ավարտել է  Արարատի ինդուստրիալ-տեխնոլոգիական տեխնիկումի «Հաշվապահական հաշվառում» բաժինը, ստացել է  հաշվապահի որակավորում, այնուհետեւ ընդունվել  Գյուղակադեմիայի «Խմորում եւ գինու տեխնոլոգիա» բաժինը, ստացել  ճարտարագետ-տեխնոլոգ որակավորում: Աշխատանքային գործունեությունը սկսել է  Արարատի քաղառում` բանվորից մինչեւ Արարատի քաղաքի տնօրեն, մինչեւ 1993թ.: 1993թ-ի  դեկտեմբերից մինչեւ 1994թ. նշանակվել եմ ՀՀ պարենի եւ մթերումների նախարարության Այգավանի կոնյակի գործարանում  որպես  իրացման գծով  փոխտնօրեն: 1994թ. ապրիլ ամսից պարենի եւ մթերումների նախարարի հրամանով նշանակվել  է  Այգավանի կոնյակի գործարանի տնօրեն` մինչեւ 1998թ. հունիս ամիսը: 1998թ.  հունիս  ամսին ընտրվել  է  ՀՀ ֆուտբոլի ֆեդերացիայի փոխնախագահ: 1998թ-ի դեկտեմբեր ամսին ազատվել  է  պաշտոնից` իր  դիմումի համաձայն:

1992թ. ընտրվել է «Ցեմենտ» ֆուտբոլային ակումբի նախագահ:

1998-ից 2000թ. ՙ«Ցեմենտ»  ֆուտբոլային թիմը եղել է Հայաստանի կրկնակի չեմպիոն,1999թ.` բրոնզե մեդալակիր, 1998-1999թ.թ. կրկնակի  գավաթակիր, 1998-2000թ.թ. սուպեր գավաթակիր, 1999թ ՀՀ «Արդար  խաղի» մրցանակակիր  է,  2000թ. պարգեւատրվել է  օլիմպիական միջազգային կոմիտեի կողմից պատվոգրով :

1999թ.-ին ստեղծել է  «ՖԱ» Արաքս  ՓԲԸ-ն, որի հիմնադիր նախագահն  է մինչեւ  օրս: 2002թ. հունիս ամսից ՀՀ Էներգետիկայի նախարարի հրամանով նշանակվել  է  Արարատի  էլցանցի պետ: Դեկտեմբերին իր  դիմումի համաձայն ազատվել է  պաշտոնից:

2004թ. նոյեմբերին «Հայաստանի էլեկտրական ցանցեր» ՓԲԸ- ի հրավերով նորից նշանակվել է Արարատի շրջանի Էլցանցի պետ եւ  աշխատել  է  մինչեւ Արարատի քաղաքապետ ընտրվելը, 2007թ. հուլիսի 1-ը: Նա  ամուսնացած  է  ունի  երեք երեխա  եւ  երեք  արու թոռնիկ: