Հունգարիայում ադրբեջանցի ոճրագործ Ռամիլ Սաֆարովի կողմից կացնահարված Հայաստանի ԶՈՒ սպա Գուրգեն Մարգարյանի հայրը՝  ինքնասպանության փորձ կատարած 65-ամյա Արտուշ Մարգարյանի վիճակը ծանր է, նրա կյանքին վտանգ է սպառնում: Այս մասին NEWS.am-ի թղթակցին հայտնեց «Մալաթիա» բ/կ-ի Վերակենդանացման բաժանմունքի ղեկավար Արթուր Հովհաննիսյանը:

Նա նշեց, որ վիրահատությունն ավարտվել է, այժմ Արտուշ Մարգարյանը գտնվում է Վերակենդանացման բաժանմունքում, միացված է արհեստական շնչառության ապարատին:  Արթուր Հովհաննիսյանն ասաց, որ նրա մոտ առկա է լյարդի, ենթաստամոքսային գեղձի վնասվածք, հետորովայնամիզային հեմատոմա: Բժշկի փոխանցմամբ` եթե հիվանդը կարողացավ հաղթահարել առաջին երեք օրերը, ամեն ինչ լավ կլինի:

Իսկ ոստիկանությունից NEWS.am-ի թղթակցին հայտնեցին, որ դեպքի առթիվ նյութեր են նախապատրաստվում, նշանակված են փորձաքննություններ:

Ավելի վաղ NEWS.am-ը հայտնել էր, որ Հունգարիայում ադրբեջանցի ոճրագործ Ռամիլ Սաֆարովի կողմից կացնահարված Հայաստանի ԶՈՒ սպա Գուրգեն Մարգարյանի հայրը՝ Արտուշ Մարգարյանը, ինքնասպանության փորձ է կատարել, նրան տեղափոխել են «Մալաթիա» բժշկական կենտրոն: NEWS.am-ի թղթակցին հիվանդանոցից հայտնել էին, որ Արտուշ Մարգարյանը դանակով մի քանի հարվածներ է հասցրել իրեն՝ ստամոքսի շրջանում, նրան հիվանդանոց են տեղափոխել կեսգիշերին:

Հիշեցնենք, 2004թ. փետրվարի 19-ին Բուդապեշտում Ռամիլ Սաֆարովը քնած ժամանակ կացնահարել էր հայ սպա Գուրգեն Մարգարյանին, ինչի համար հունգարական դատարանի կողմից դատապարտվել էր ցմահ ազատազրկման: Երկու սպաներն էլ մասնակցում էին ՆԱՏՕ-ի «Գործընկերություն հանուն խաղաղության» ծրագրի շրջանակում կազմակերպված անգլերեն դասընթացներին: Հայ մյուս սպային սպանելու ոճրագործի փորձը ձախողվել էր: 2006թ. ապրիլի 13-ին Բուդապեշտի դատարանը Սաֆարովին դատապարտել էր ցմահ ազատազրկման` առանց 30 տարի ներման իրավունքի:

2012թ. օգոստոսի 31-ին Հունգարիայի կառավարությունը Սաֆարովին արտահանձնել էր Ադրբեջան, որտեղ նրան անհապաղ ազատել էին, մեծարել իբրեւ ազգային հերոսի, կոչումը բարձրացրել, բնակարան եւ նպաստ հատկացրել: Նույն օրը Հայաստանը հայտարարել էր Հունգարիայի հետ դիվանագիտական հարաբերությունները կասեցնելու մասին: