Իրավապաշտպաններ Արթուր Սաքունցն ու Ժաննա Ալեքսանյանը համատեղ հայտարարություն են տարածել, որով դադարեցնում են իրենց մասնակցությունը զինծառայողների մահվան հարցերով հանձնաժողովի կազմում:

Հայտարարությունում ասվում է.

«Հաշվի առնելով ՀՀ պաշտպանության նախարարության քննչական ծառայության կողմից Սյունիքի նախկին մարզպետ Սուրիկ Խաչատրյանի որդու՝ Տիգրան Խաչատրյանի եւ թիկնապահի նկատմամբ քրեական հետապնդումը դադարեցնելու մասին ակնհայտ ապօրինի որոշումը, որը կայացավ ՀՀ զինվորական դատախազ Գեւորգ Կոստանյանի անմիջական ուղղորդմամբ եւ հսկողությամբ,  հայտարարում ենք, որ անհնարին ենք համարում մեր հետագա գործունեությունը դեռեւս աշխատանքները չսկսած զինծառայողների մահվան հարցերով հանձնաժողովի կազմում:

Նախաքննության փուլում աղմկահարույց քրեական այս գործով ՊՆ քննչական ծառայության կողմից քրեական հետապնդումը դադարեցնելու մասին որոշումը ավելի է խորացնում, արդեն իսկ առկա, հանրության անվստահությունը ի պաշտոնե վերահսկողություն իրականացնող ՀՀ Զինվորական դատախազության նկատմամբ: Հանրության համար մեծ հետաքրքրություն ներկայացնող այս գործով ՀՀ զինդատախազ Գեւորգ Կոստանյանի միակողմանի հրապարակային ելույթները վստահություն չեն ներշնչում ՀՀ Զինված ուժերում մահվան դեպքերով քրեական գործերի օբյեկտիվ եւ բազմակողմանի ուսումնասիրման համար:

Արթուր Սաքունց,  Հելսինկյան Քաղաքացիական Ասամբլեայի Վանաձորի գրասենյակ

Ժաննա Ալեքսանյան,  «Լրագրողներ հանուն մարդու իրավունքների» ՀԿ