Ադրբեջանի «Ենի Ադրբեջան»իշխող կուսակցությունը «Ազիդլիգ»  (Ազատություն)  ռադիոյին մեղադրել է «անօրինական նախընտրական քարոզչության մեջ» եւ համապատասխան  բողոքով դիմել ԿԸՀ: 

ԿԸՀ-ին նամակ է ուղարկել կուսակցության լիազոր ներկայացուցիչ Ալի Ահմեդովը: Նա կարծում է, որ  «Ազիդլիգ» ռադիոն կոպիտ խախտում է Ընտրական օրենսգրքի պահանջները եւ ռադիոյի համացանցային էջում նույնիսկ հատուկ թողարկում է ստեղծվել. «Ընտրություններ-2013», որն ունի «Ճանաչիր թեկնածուին» ենթակետը:  Ըստ նամակի հեղինակի՝ ռադիոն լրջորեն խախտել է օրենքի պահանջը եւ իր հաղորդումներում քարոզում է որոշակի թեկնածուի օգտին:

Նա հիշեցնում է, որ «Ազիդլիգ» ռադիոյի համացանցային էջում նշված է, որ այդ ռադիոն ֆինանսավորվում է ԱՄՆ-ի Կոնգրեսի կողմից եւ ոչ կոմերցիոն կառույց է, այն պարտավորվում է չծավալել  որեւէ տեսակի քարոզչություն:

Contact.az-ը հայտնում է, որ «Ազիդլիգ» ռադիոն դեռ չի մեկնաբանել բողոքը: