Հնդկական Թամիլանդ նահանգի ոստիկանությունը ապօրինի զենք փոխադրելու համար հոկտեմբերի 18-ին  կալանավորել է 35 մարդու, որոնք գտնվել են Seaman Guard Ohio նավում:

Հնդկական իշխանությունների տվյալով՝ նավում, որը հնդկական ջրեր մտնելու թույլտվություն չի ունեցել, հայտնաբերվել  են 31 ինքնաձիգ եւ մոտ հինգ հազար փամփուշտ՝ առանց համապատասխան թույլտվության:

Seaman Guard Ohio-ում նաեւ 1,5 հազար լիտր դիզվառելիք է եղել:

Ամերիկյան AdvanFort ընկերությանը պատկանող եւ Սյերա-Լեոնայի դրոշով լողացող նավը կանգնեցվել էր հոկտեմբերի 12-ի գիշերը Տուտիկորին նավահանգստում:  Նավում անձնակազմի 10 անդամներ եւ զինված 25 հսկիչներ են եղել՝ Հնդկաստանի, Էստոնիայի, Մեծ Բրիտանիայի, Ուկրաինայի քաղաքացիներ, գրում է «ՌԻԱ Նովոստին»:

AdvanFort ընկերությունը այս շաբաթ հայտարարել է, որ Seaman Guard Ohio-ն Տուտիկորին մտել է «Ֆայլին» ցիկլոնից պատսպարվելու համար:  Ընկերության ղեկավար Ուիլյամ Ուոթսոնը հայտարարել է, որ անձնակազմի անդամների պարտականություններից էր նավը ծովահեններից պաշտպանելը, այդ պատճառով էլ նավում պաշտպանական միջոցներ եւ զենք-զինամթերք են եղել:

ՈՒՆԻԱՆ-ը հայտնում է, որ Ուկրաինայի արտաքին քաղաքական գերատեսչությունը հաստատել է Seaman Guard Ohio նավի հսկիչների կալանավորման լուրը: