Մոսկվայի քաղաքապետ Սերգեյ Սոբյանինը չի բացառել Մոսկվայում եւ Մերձմոսկվայում միգրանտների նկատմամբ հատուկ ռեժիմի կիրառումը:  Քաղաքապետն այդ մասին եզրակացրել է`  Արեւմտյան Բիրյուլեւոյում խժդժություններից հետո միգրացիոն օրենսդրության մեջ բազմաթիվ խախտումներ հայտնաբերելը մեկնաբանելով: Նա նկատել է, որ ներկայումս Մոսկվայում ապրում են 500-600 հազար ներգաղթյալներ, իսկ Մոսկվայի մարզում` երկու միլիոն: 

Սոբյանինը կարծում է, որ սկզբունքորեն կարելի է վիզային ռեժիմ կիրառել:

Սերգեյ Սոբյանինը կրկին դեմ է արտահայտվել  միգրանտների ընդհանուր ինտեգրմանը: «Եթե որեւէ մեկին  պետք է ինտեգրել, ապա գոնե համապատասխան մշակութային միջավայրից` լեզվի, պատմության տեսանկյունից: Դրանք կարող են լինել մարդիկ Ուկրաինայից, Բելառուսից: Իսկ Միջին Ասիայի բնակիչներին դժվար է հարմարվելը:  Նրանց մեծ մասը, հատկապես երիտասարդությունը, ռուսերեն էլ չի խոսում:  Ես միգրանտներին այստեղ պահելու ոչ մի պատճառ չեմ տեսնում», - քաղաքապետի խոսքերը փոխանցում է «Մոսկովսկի կոմսոմոլեցը»:

Ընդ որում նա նշել է, որ Մոսկվայում միգրանտների թիվը աստիճանաբար պետք է նվազի, իսկ  նրանց աշխատանքի որակը` բարձրանա: 

Նա ընդգծել է, որ վերջին մի քանի տարում Մոսկվայում միգրանտներին օգտագործելու քվոտան պահպանվում է 200 հազարի մակարդակի վրա, հաղորդում է «ՌԻԱ Նովոստին»: 

Սոբյանինը նաեւ նկատել է, որ երաշխիք չկա, թե Բիրյուլեւոյի նման դեպքեր չեն կրկնվի:

Սոբյանինը հայտնել է, որ ռուսաստանցիների աշխատանքի կազմակերպման համար  անհրաժեշտ է ստեղծել տնտեսական խթաններ: Նա խոստովանել է ներռուսաստանյան միգրացիայի հետ կապված  հարցերի լուծման դժվարությունը: «Երբ քաղաքացիները պահանջում են կարգուկանոն հաստատել միգրացիայի ուղղությամբ, կարծում եմ, որ 60%-ը ենթադրում է ոչ թե արտասահմանցիներին, այլ հարավային հանրապետություններից մեր սեփական քաղաքացիներին», - ասել է նա: Քաղաքապետը նշել է, որ այդ մարդկանց մի մասն ամբողջությամբ ադապտացվել է եւ նույնիսկ հասարակության վերնախավում է ընդգրկված, իսկ մյուս մասն էլ հանցավոր գործունեությամբ է զբաղվում, որը լարվածություն է  առաջացնում: