Նախընտրելի
Ռուսական միգրացիոն քաղաքականությունը պետք է խստացնել` հատկապես Արեւմտյան Բիրյուլեւոյի խռովություններից հետո:
Դաշնային միգրացիոն ծառայության պետ Կոնստանտին Ռոմոդանովսկին «Կոմերսանտ» թերթի հետ հարցազրույցում ներկայացրել է բնակության իրավունք տրամադրելու կարգուկանոնը խստացնելու բարեփոխման մասին, հայտնում է rbc-ն: Նա նաեւ նշել է, որ կխստացվի միգրացիոն հոսքի վերահսկողությունը:
«Գալիս են չհարմարվող, անկիրթ երիտասարդներ Միջին Ասիայից: Նրանք լարվածություն են ստեղծում Ռուսաստանի բնակչության շրջանում, ինչն էլ ազդում է այն եկվորների վրա, որոնք իսկապես պետք են Ռուսաստանին»,– հայտնել է ԴՄԾ-ի պետը: ՌԴ ժամանած մարդկանց տեղաշարժերին պետք է հետեւել, նրանց պետք է կառավարել, հավելել է նա: «Կարծում եմ, որ անհրաժեշտ է մտրակ` թեկուզ փափուկ, քաղաքակիրթ»,– ընդգծել է Ռոմոդանովսկին:
Ժամանակավորապես բնակվողի կարգավիճակ է ստանում Ռուսաստանում առնվազն 90 օր մնալ վճռած միգրանտը: Ինչ վերաբերում է մշտական բնակության կարգավիճակին, ապա այն կունենա բնակության ընթացքում համապատասխան քանակությամբ միավորներ հավաքած միգրանտը: «Միավորները նշանակվում են, օրինակ, ռուսերենի իմացության, Ռուսաստանում կրթություն ստանալու, բարձր որակավորման համար»,– պատմել է Ռոմոդանովսկին: Ներկայումս ՌԴ մուտքն արգելվել է 285000 մարդու համար, պատմել է ԴՄԾ-ի պետը:
Ըստ նրա` եկվորների նկատմամբ ռուսաստանցիների անհանդուրժողականության հարցը կարելի է լուծել միգրանտների որակը բարձրացնելու ճանապարհով:
