Կարո Եղնուկյանի նշած համարանիշերով «Ֆոլքսվագեն» եւ «Հոնդա» ավտոմեքենաներ գոյություն չունեն, որոնք ըստ նրա հայտարարության, հետեւել են իրեն: Այս մասին հայտարարություն է տարածել ոստիկանության մամուլի ծառայությունը:

Հաղորդագրության մեջ նշվում է.

«Նոյեմբերի 4-ին, ժամը 18.00-ին, ոստիկանության Երեւան քաղաքի օպերատիվ կառավարման կենտրոն Երեւան քաղաքի բնակիչ Կարո Եղնուկյանից ահազանգ է ստացվել, որ Թումանյան-Կողբացի փողոցների խաչմերուկում իրեն հետեւում են «Ֆոլքսվագեն» մակնիշի 10 VS 100  պետհամարանիշի եւ «Հոնդա» մակնիշի 10 ՍՕ 010 պետհամարանիշի ավտոմեքենաներով, իսկ ինքը վարում է սեւ գույնի «Ֆորդ ֆյուժն», 34 VO 758 համարանիշի ավտոմեքենա:

Ոստիկանության ՊՊԾ գնդի ծառայողները ցուցումի համաձայն անմիջապես մեկնել են Կողբացի-Բյուզանդ փողոցների խաչմերուկ, որտեղ նրանց է մոտեցել մի քաղաքացի, ներկայացել որպես Կարո Եղնուկյան եւ հայտնել ահազանգով տեղեկացրածը: Ոստիկանության ծառայողները շրջագայել են նշված տարածքում, սակայն նման մակնիշի ու համարանիշի ավտոմեքենաներ չեն հայտնաբերել: Ոստիկանները Եղնուկյանին հրավիրել են ոստիկանության Կենտրոնական բաժին, բայց նա հրաժարվել է՝ հայտարարելով, որ բաժնում իր տվյալները կան:

Ոստիկանության Կենտրոնական բաժնից հեռախոսակապ է հաստատվել Եղնուկյանի հետ, նրան կրկին հրավիրել են բաժին՝ իր ահազանգի վերաբերյալ բացատրություն տալու, բայց նա հրաժարվել է: Եղնուկյանի հետ եւս մի քանի անգամ հեռախոսակապ է հաստատվել նույն նպատակով, բայց նա կտրականապես հրաժարվել է ներկայանալ ոստիկանություն՝ տարբեր պատճառաբանություններով (ժամանակ չունի, հոգնած է, դեռ չի ընթրել եւ այլն):

Ձեռնարկված միջոցառումներով պարզվել է, որ Եղնուկյանի նշած համարանիշերով «Ֆոլքսվագեն» եւ «Հոնդա» մակնիշի ավտոմեքենաներ գոյություն չունեն: Հայտնաբերվել եւ ոստիկանության Կենտրոնական բաժին են հրավիրվել այդ համարանիշերով ավտոմեքենաների վարորդները իրենց «Լեքսուս» եւ «Նիվա» ավտոմեքենաներով: Նրանք բացատրություն են տվել այն մասին, որ իրենց մեքենաները նշված օրը կայանված են եղել եւ չեն շահագործվել Կենտրոնի վարչական տարածքում ոչ իրենց, ոչ ուրիշ անձանց կողմից:

Քանի որ ձեռնարկված միջոցառումներով Կ. Եղնուկյանի ահազանգում նշված փաստերը չեն հիմնավորվել, ստեղծված նյութերը կցվել են ի շարք»: