նախընտրելի դարձնել
Հայաստանի ոստիկանությունը նոր մանրամասներ է հայտնում Երեւանի Նոր Արեշ թաղամասում նոյեմբերի 18-ին, տեղի ունեցած սպանությունից:
Ոստիկանության հաղորդագրության մեջ ասվում է.
«Նոյեմբերի 18-ին, ժամը 20.35-ին, Հայաստանի ԱԻՆ «911» ծառայությունից ոստիկանության Երեւան քաղաքի վարչության օպերատիվ կառավարման կենտրոնում ահազանգ է ստացվել, որ Նոր Արեշի 34-րդ փողոցի 2-րդ նրբանցքի տներից մեկից դանակահարված տղամարդու են տեղափոխել «Էրեբունի» բժշկական կենտրոն:
Ժամը 20.40-ին նշված բուժկենտրոնից նույն դեպքի հետ կապված հաղորդում է ստացվել, որ «կրծքավանդակի ձախ կեսի կտրած-ծակած վերքեր» ախտորոշմամբ իրենց մոտ է տեղափոխվել մոտ 50 տարեկան տղամարդ:
Մեկնած օպերատիվ խումբը պարզել է, որ նշված անձը 56-ամյա Եղիա Ապանյանն է, որը նույն օրը «Էրեբունի» բժշկական կենտրոնում մահացել է:
Ոստիկանության Երեւան քաղաքի վարչության եւ Էրեբունու բաժնի ծառայողները ժամը 23.00-ին, նշված սպանությունը կատարելու կասկածանքով, Էրեբունու բաժին բերման են ենթարկել 42-ամյա Արմեն Մ.-ին: Նա խոստովանել է, որ ժամը 20.00-ի սահմաններում Նոր Արեշի 34-րդ փողոցի 2-րդ նրբանցքի տներից մեկում, ոգելից խմիչքի ազդեցության տակ, վիճաբանել է իր վաղեմի ծանոթ Ե. Ապանյանի հետ եւ իր մոտ եղած խոհանոցային դանակով մի քանի անգամ հարվածելով նրա կրծքավանդակին` դիմել է փախուստի:
Հանցագործության գործիք դանակը հայտնաբերվել, առգրավվել եւ ուղարկվել է փորձաքննության:
Փաստի առթիվ ՀՀ քրեական օրենսգրքի 104 հոդվածի 1-ին մասի հատկանիշներով հարուցվել է քրեական գործ:
Արմեն Մ.- ձերբակալված է:
Նշանակվել է դատաբժշկական փորձաքննություն:
Կատարվում է նախաքննություն»:
