նախընտրելի դարձնելԵթե այսօր պատերազմ սկսվի Ադրբեջանի հետ, հայկական կողմն անպայման հաղթանակ կտանի, եւ այս անգամ այդ հաղթանակի պտուղներն ավելի զգալի կլինեն, Հայաստանը դեպի ծով ելք կունենա, իսկ Ադրբեջանը կկորցնի իր ինքնիշխանությունը: Լրագրողների հետ հանդիպմանը ապրիլի 1-ին նման կանխատեսում է արել պաշտպանության, ազգային անվտանգության եւ ներքին գործերի խորհրդարանական խմբակցության ղեկավար, ՀՅ Դաշնակցության անդամ Հրայր Կարապետյանը:
«Թող Ադրբեջանը հույսը չդնի իր նավթի վրա: Արդեն հայտնի է, որ նավթի համաշխարհային պաշարները վերջանալու են 42 տարի անց, իսկ ադրբեջանական նավթի պաշարները 20 տարի անց»,- հավաստիացրել է Կարապետյանը: Ընդ որում, նա քիչ հավանական է համարել ղարաբաղյան հակամարտության գոտում ռազմական գործողությունների վերսկսման հնարավորությունը: Նա ընդգծել է, որ առ այսօր հայկական կողմը չի պարտվել բանակցային գործընթացում: «Իսկ հայկական կողմին միակողմանի զիջումներ պարտադրելու բոլոր փորձերը դատապարտված են ձախողման, ժողովուրդը երբեք չի համաձայնվի դրա հետ եւ կստացվի այն, ինչ եղավ 1996թ.՝ իշխանափոխություն»,- նկատել է Կարապետյանը: Նա գոհունակությամբ նշել է, որ տարեցտարի մեծանում է Հայաստանի եւ Լեռնային Ղարաբաղի ինտեգրման մակարդակը:
Խոսելով հայ-թուրքական հարաբերությունների եւ Հայոց ցեղասպանության մասին, Հրայր Կարապետյանը ցավով նկատել է, որ Հայաստանի իշխանությունները չեն ընդունում ՀՅԴ ներկայացրած օրինագիծը, որը քրեական պատասխանատվություն է նախատեսում Հայոց ցեղասպանության ժխտման համար: «Դա ուղղակի ամոթ է, որ մեր կառավարությունը չի ընդունում այդ փաստաթուղթը, հատկապես այն ֆոնին, երբ նման փաստաթղթեր ընդունվել են արտերկրում»,- ասել է Կարապետյանը եւ հույս հայտնել, որ ԱՄՆ նախագահ Բարաք Օբաման ապրիլի 24-ին կարտասանի «ցեղասպանություն» բառը:
