Այսօր Վիլնյուսի «Արեւելյան գործընկերության» գագաթաժողովում Ուկրաինան եւ ԵՄ-ն համատեղ օդային տարածքի վերաբերյալ համաձայնագիր են  նախաստորագրել: Այս մասին հայտնում է ԵՄ-ի պաշտոնական կայքը: Եվրահանձնաժողովի փոխնախագահ  Սիյմ Կալասը հայտարարել է, որ «Վիլնյուսում այսօր ձեռքբերված համաձայնագիրը Ուկրաինային եւ ԵՄ-ին հնարավորություն կտա ավիացիոն գործընկերներ դառնալ ՝ շուկաների  աստիճանական ինտեգրման շնորհիվ»:

«Համաձայնագրի նպատակն է աստիճանաբար ավիացիայի համապատասխան շուկաներ բացելը  եւ Ուկրաինային ավիացիայի եվրոպական տարածք ինտեգրելը:  Դրա համար Ուկրաինան պետք է իր օրենսդրությունը համապատասխանեցնի ԵՄ-ի չափորոշիչներին եւ կիրառի ԵՄ-ի պահանջները այնպիսի բնագավառներում, ինչպիսիք են թռիչքների անվտանգությունը, օդային երթեւեկության կազմակերպումը,  անվտանգությունը, շրջակա միջավայրը, տնտեսական վերահսկողությունը, մրցունակությունը եւ սպառողների իրավունքների պաշտպանությունը», -ասվում է հաղորդագրության մեջ, փոխանցում է ՈՒՆԻԱՆ-ը: