նախընտրելի դարձնել
2011-ի սեպտեմբերի 23-ին վնասազերծված «բանդայի» գործով ձերբակալված Արտյուշա Հակոբյանի կինը` Մարինա Գեորգաձեն, որը վիրահատության նպատակով մեկնել էր Մոսկվա, առանց վիրահատվելու վերադարձել է: Այս մասին NEWS.am-ի թղթակցի հետ զրույցում ասաց Արտյուշա Հակոբյանի հայրը` Սուրիկ Հակոբյանը:
Նա նշեց, որ հարսը շաբաթներ շարունակ բուժում է ստացել, նրան նախապատրաստել են վիրահատության, սակայն ասել են, որ վիրահատության նպատակով գարունը գնա Մոսկվա: Մինչեւ այդ Սուրիկ Հակոբյանն ասել էր, որ հարսի կյանքին վտանգ է սպառնում, քանի որ ուռուցք ունի:
Ավելի վաղ տեղեկացրել էինք, որ սեպտեմբերի 23-ին վնասազերծված «բանդայի» գործով ձերբակալված Արտյուշա Հակոբյանի կնոջը` Մարինա Գեորգաձեին կալանավորվել էր, ապա տեղափոխվել Վրաստան: Նրա փաստաբան Արամ Ճուղուրյանը NEWS.am-ին հայտնել էր, որ դեմ է եղել Գեորգաձեի տեղափոխությանը: Որոշումը եղել է այստեղի իրավապահներինը, սակայն կատարվածի փաստով բողոքարկելու մեխանիզմ չկա: Գեորգաձեի Հայաստանի պաշտպանական կողմը Եվրադատարան գանգատ է ուղարկել, քանի որ այս դեպքում, ըստ նրանց, մարդու իրավունքների կոնվենցիայի խախտումներ կան, որ չի կարելի հոգեկան հիվանդությամբ տառապող մարդուն անազատության մեջ պահել եւ նույն մարդու վերաբերյալ 2 անգամ տարբեր որոշումներ կայացնել: Իսկ Վրաստանում պաշտպանական կողմը միջոցներ է ձեռնարկում, որ հիվանդության հետ հաշվի նստեն եւ պատժից ազատեն:
Տեղեկացրել էինք նաեւ, որ մինչեւ Երեւանում հայտնի «բանդայի» վնասազերծումը եւ Մարինա Գեորգաձեի ձերբակալումը, նա խարդախության մեղադրանքով հետախուզման մեջ էր գտնվում նաեւ Վրաստանի իրավապահների կողմից: Նրա փաստաբանը NEWS.am-ի թղթակցի հետ զրույցում պատմել էր, որ 1998թ-ին Մարինա Գեորգաձեն Թիֆլիսում տուրիստական գործակալություն է ունեցել, սակայն մի անգամ ինչ-ինչ պատճառներով Մոսկվայից Եվրոպա տուրիստներին տեղափոխելու պարտավորությունները չեն կատարվել: Հետագայում այն մարդիկ ովքեր վճարել էին ուղեւորության համար եւ տեղ չէին հասել, բողոքել էին եւ դա դարձել էր քրգործ:
Արդյունքում Գեորգաձեն խարդախության համար դատապարտվել էր 5 տարվա պայմանական ազատազրկման, բայց նա չէր կալանավորվել: 2.5 տարի Գեորգաձեն մնացել էր Թիֆլիսում, որից հետո եկել էր Հայաստան, որտեղ էլ նրա առողջական վիճակը կտրուկ վատացել էր եւ նա պառկել էր հոգեբուժական հիվանդանոցում: Հոգեբուժարանում գտնվելու պատճառով Գեորգաձեն ճիշտ ժամանակին չի գնում Թիֆլիս, իսկ, ըստ կարգի, եթե պատիժը պայմանական չկիրառելու կարգը խախտում ես, իրավունք ունեն պայմանականը վերացնել, որն էլ իրականացնում են: Դրանից հետո պատիժը մնում է ազատազրկումը եւ նրա նկատմամբ կրկին հետախուզում են հայտարարում: 2010թ-ին ՀՀ ոստիկանությունը նրան բռնում է եւ կալանավորում: 40-օրյա ժամկետում բժշկական անկախ հանձնաժողովը նրան զննում է եւ հաստատում, որ նա ծանր հիվանդությամբ է տառապում, ինչը նշանակում է, որ նրա հանձնումը վրացական կողմին նրա կյանքի եւ առողջության համար վտանգավոր է:
Արդարադատության նախարարությունը օրենքով սահմանված կարգով մերժում է Մարինա Գեորգաձեին հանձնել Վրաստանի իրավապահներին: Սակայն, երբ սկսվում է բանդայի գործը Մարինա Գեորգաձեին, որդուն եւ դստերը որպես ընտանիքի անդամ, տանում են բաժին: Այնտեղ ոստիկաններից մեկը, ով 2010թ-ին այդ գործով շփվել է նրա հետ, ճանաչում է Գեորգաձեին ու նրան կալանավորում են: Ի դեպ, փաստաբանը նաեւ նշել էր, որ Մարինա Գեորգաձեն ձերբակալված է Վրաստանին հանձնելու նպատակով: Նա «բանդայի» գործով բացարձակապես կապ չունի, նույնիսկ չի հարցաքննվել: Իսկ 2012թ-ի դեկտեմբերին ազատ արձակվեց:
