նախընտրելի դարձնելԲելառուսի նախագահ Ալեքսանդր Լուկաշենկոն կարծում է, որ Արեւմուտքը չպետք է օգտագործի Ուկրաինան` Ռուսաստանի վրա ճնշումներ գործադրելու համար:
«Չպետք է օգտագործել Ուկրաինան` որպես Ռուսաստանին ճնշելու գործոն, եւ ընդհանրապես` ոչ միայն Ռուսաստանին», - երկուշաբթի հայտարարել է Բելառուսի նախագահը` Մինսկում հանդիպելով Ռուսաստանի Անվտանգության խորհրդի քարտուղար Նիկոլայ Պատրուշեւի հետ:
Ըստ Լուկաշենկոյի` Մոսկվան եւ Մինսկը շահագրգռված են, որ Ուկրաինան չդառնա ՆԱՏՕ-ի բազա:
Նա հավելել է, որ Ուկրաինայի ժողովուրդը պետք է իր կյանքն այնպես դասավորի, ինչպես ինքն է կամենում` խնդիրներ չստեղծելով հարեւանների համար, փոխանցում է ԲԵԼՏԱ-ն:
«Կարծում եմ` կանցնի ժամանակ, եւ ամեն ինչ կկարգավորվի, արդեն այժմ Ուկրաինայում սթափվում են», - նշել է Լուկաշենկոն: Ըստ նրա` Ուկրաինան Արեւմուտքի մաս չի դառնա: «Այնտեղ ժողովուրդը միանշանակ համագործակցության է տրամադրված, սակայն դա քաղաքական գործիչների ուղեղի մթագնում է, պատահում է»:
Բելառուսի նախագահը նաեւ նշել է, որ Արեւմուտքի պատժամիջոցները Ռուսաստանի դեմ բացասական կանդրադառնան նաեւ ողջ հետխորհրդային տարածաշրջանի տնտեսության վրա, եւ ընդգծել է ԱԽ քարտուղարների հանդիպման ժամանակ կայանալիք խորհրդակցությունների կարեւորությունը` երկու երկրների դիրքորոշումները համակարգելու համար:
