նախընտրելի դարձնելԵվրոպայի եւ Եվրասիայի հարցերով ԱՄՆ պետքարտուղարի օգնական Վիկտորյա Նուլանդը երբեք չի հանդիպել Ուկրաինայի ուլտրաազգայնական «Աջ սեկտոր» կազմակերպության ներկայացուցիչներին, իսկ ԱՄՆ-ի վարչակազմը ոչ մի աջակցություն չի ցուցաբերում այդ խմբավորմանը, փոխանցում է ԻՏԱՌ-ՏԱՍՍ-ը` վկայակոչելով ԱՄՆ պետդեպի մամուլի ծառայության պետի տեղակալ Մարի Հարֆի էլեկտրոնային նամակը:
Նա այդպիսով մեկնաբանել է ռուսական լրատվամիջոցների այն տեղեկությունները, որ «Աջ սեկտորի» պատվիրակներն անցյալ ամսվա վերջին այցելել էին Վաշինգտոն` միջոցներ տրամադրելու վերաբերյալ բանակցությունների համար: Տվյալ թեմային Bloomberg հեռուստաալիքի եթերում անդրադարձել էր ՌԴ արտգործնախարար Սերգեյ Լավրովը:
«Կցանկանայի նաեւ ստանալ Վաշինգտոնի պատասխանը «Աջ սեկտորի» համակարգող Անդրեյ Արտեմենկոյի գաղտնի այցի վերաբերյալ` Վաշինգտոնում Վիկտորյա Նուլանդի հետ հանդիպելու համար: Մենք շատ կուզեինք ստանալ այս հարցերի պատասխանները: Շատ վտանգավոր է շահարկել Եվրոպայում կատարվող իրադարձությունները օվկիանոսից այն կողմ, սա ձեզ համար հեռակառավարվող խաղեր չեն: Մեզ համար սա շատ կարեւոր է», - նշել է Լավրովը:
