նախընտրելի դարձնելՎարչապետ Հովիկ Աբրահամյանն այսօր ընդունել է Հայաստանի Հանրապետությունում Նորվեգիայի Թագավորության նորանշանակ արտակարգ եւ լիազոր դեսպան Լեյդուլվ Ատլե Նամտվեդտին (նստավայրը՝ Մոսկվա):
Կառավարության ղեկավարը շնորհավորել է դեսպանին դիվանագիտական առաքելությունն ստանձնելու առթիվ եւ հաջողություն մաղթել պաշտոնավարման ընթացքում: Վարչապետը նշել է, որ ՀՀ կառավարությունը հնարավորինս կաջակցի դիվանագետի՝ երկու երկրների բարեկամական հարաբերությունների ամրապնդմանը եւ զարգացմանն ուղղված գործունեությանը: Շնորհավորելով Հովիկ Աբրահամյանին ՀՀ վարչապետի պաշտոնում նշանակվելու առթիվ՝ Նորվեգիայի դեսպանը վստահեցրել է, որ առավելագույն ջանքերը կգործադրի հայ-նորվեգական հարաբերություններն ակտիվացնելու եւ խորացնելու ուղղությամբ:
Դեսպանի խնդրանքով վարչապետն անդրադարձել է ՀՀ նորանշանակ կառավարության գործունեության ծրագրին, ներկայացրել ընթացիկ եւ նախատեսվող բարեփոխումները: Հովիկ Աբրահամյանը նշել է, որ ծրագիրը լինելու է իրատեսական՝ երկրի տնտեսական զարգացման հստակ առաջնահերթություններով: Քայլեր են ձեռնարկվելու Հայաստանում գործարարությամբ զբաղվելու հավասար պայմաններ ստեղծելու եւ օտարերկրյա ներդրումներ ներգրավելու ուղղությամբ:
Կառավարության ղեկավարը, ընդգծելով երկկողմ տնտեսական կապերի աշխուժացման անհրաժեշտությունը, կարեւորել է բարձր մակարդակի պաշտոնական փոխայցերի կազմակերպումը: Հայաստանի վարչապետը Նորվեգիայի վարչապետին է փոխանցել մեր երկիր այցելելու հրավերը եւ նպատակահարմար համարել այցի շրջանակում հայ-նորվեգական գործարար համաժողովի անցկացումը:
Կողմերը բարձր են գնահատել երկու երկրների միջեւ ձեւավորված հումանիտար կապերը: Պարոն Նամտվեդտը նշել է, որ Նորվեգիայում առկա փոքրաթիվ հայկական համայնքը վայելում է նորվեգացիների հարգանքը: Իր հերթին Հովիկ Աբրահամյանը շնորհակալություն է հայտնել 1988 թ. ի վեր Նորվեգիայի կողմից Հայաստանին ցուցաբերված մարդասիրական, տեխնիկական եւ ֆինանսական օժանդակության համար:
Հանդիպման ընթացքում զրուցակիցները մտքեր են փոխանակել նաեւ աշխարհաքաղաքական եւ տարածաշրջանային զարգացումների վերաբերյալ:
