նախընտրելի դարձնել
ՌԴ վարչապետ Դմիտրի Մեդվեդեւը հայտարարել է, որ ծիծաղելի է համարում ԱՄՆ-ին վնասելու համար Apple-ի արտադրանքից հրաժարվելը։
«Ինչ կապ ունեն Ամերիկայի հետ մեր հարաբերությունները iPhone-ի հետ։ Այդ դեպքում ուրեմն եկեք հրաժարվենք բոլոր արտասահմանյան ապրանքներից, եւ ինչ կունենա՞նք։ Հյուսիսային Կորե՞ա։ Դա մեր ուղին չէ», - հայտարարել է Մեդվեդեւը՝ պատասխանելով լրագրողների այն հարցին, թե չի պատրաստվում արդյոք հրաժարվել ամերիկյան գաջետներից՝ երկրների միջեւ հարաբերությունների լարվածության պատճառով, փոխանցում է «Կոմսոմոլսկայա պրավդան»։
«Հակառակը, կարծում եմ, որ ոչ մենք, ոչ ամերիկացիները, ոչ եվրոպացիները չպետք է ոչ մեկից հրաժարվենք։ Apple-ի արտադրանքից հրաժարվելով ամերիկացիներին վնասելը՝ ծիծաղելի է», - հավելել է վարչապետը։ Ընդ որում, ըստ նրա, ինքն ունի iPhone-ի եւ iPad-ի հայկական համարժեքները։
«Հայաստանի գործընկերներն ինձ արմֆոն եւ արմփադ են նվիրել», - ասել է Մեդվեդեւը՝ հավելելով, որ դրանք աշխատասենյակում չեն։
Բացի դրանից, ռուս վարչապետը պարզաբանել է, որ աշխատանքի ժամանակ ինքն օգտվում է պետությանը պատկանող երկու պլանշետից, եւ հերքել է այն լուրերը, որ դրանցում խաղեր կան ներդրված։
Նշենք, որ այս տարվա մարտին ՌԴ վարչապետին արմֆոն եւ արմփադ էր նվիրել նախկին վարչապետ Տիգրան Սարգսյանը։
