նախընտրելի դարձնել
Երեւանի քաղաքապետարանում ներկայացվել են Ասիական զարգացման բանկի ֆինանսավորմամբ քաղաքային կայուն զարգացման ներդրումային ծրագրի` Տրանշ 2-ի` Բաբաջանյան փողոց-Աշտարակի խճուղի եւ Դավթաշենի խճուղի-Աշտարակի խճուղի շրջանցիկ նոր ճանապարհների հնարավոր ծրագծի տարբերակները: Ուսումնասիրությունն ու նախագծումն իրականացվել է ֆրանսիական նախագծային «Egis international» ընկերության կողմից: Հանդիպմանը մասնակցել են Երեւանի քաղաքապետի տեղակալ Վահե Նիկոյանը, Երեւանի գլխավոր ճարտարապետ Տիգրան Բարսեղյանը, քաղաքապետարանի համապատասխան ստորաբաժանումների պատասխանատուները, վարչական շրջանների ղեկավարներ, ինչպես նաեւ Երեւանի կառուցապատման ներդրումային ծրագրերի իրականացման գրասենյակի, «Երեւաննախագիծ»-ի ներկայացուցիչները:
«Egis international» ընկերության ընկերության ներկայացուցիչ, նախագծման թիմի ղեկավար Պիեռ Մորիսը, հատվածաբար ներկայացնելով առաջարկվող լուծումները, ընդգծել է, որ տարբերակներում ներառվել է նաեւ Երեւանի գլխավոր հատակագծով նախատեսված ճանապարհների կառուցման հեռանկարային տարբերակները:
Քաղաքապետի տեղակալ Վահե Նիկոյանը, ընդգծելով մայրաքաղաքում կենտրոնի բեռնաթափման անհրաժեշտությունը, կարեւորել է շրջանցիկ նոր ճանապարհների կառուցումը եւ հատկանշել, որ ներկայացված առաջարկներից պետք է ընտրվի տնտեսապես առավել արդյունավետ եւ մասնագետների կողմից ընդունելի տարբերակը:
«Ասիական զարգացման բանկի հետ համագործակցության շրջանակում այս քաղաքային կայուն զարգացման ներդրումային ծրագրի Տրանշ 1-ով արդեն իսկ մեկնարկել է Արգավանդի մայրուղի-Շիրակի փողոց նոր ավտոճանապարհի շինարարությունը: Ծրագրի 2-րդ հատվածի ծրագծի վերջնական տարբերակն ընտրելու նպատակով պետք է լրացուցիչ ուսումնասիրություններ կատարել, որպեսզի հետագայում քննարկենք արդեն ծրագրի իրագործման հնարավորությունները»,-նշել է Վահե Նիկոյանը:
Հանդիպման ժամանակ մասնակիցները ներկայացրել են իրենց կարծիքներն ու մոտեցումները՝ առաջարկվող տարբերակների շուրջ:
Կողմերը պայմանավորվածություն են ձեռք բերվել կատարել լրացուցիչ ուսումնասիրություններ եւ առաջիկայում նախատեսված հերթական հանդիպմանը քննարկել դրանք:
