Հայաստանի պաշտպանության փոխնախարար Դավիթ Տոնոյանը, որի գլխավորած պատվիրակությունն այս օրերին ԱՄՆ-ում է, վստահաբար ասում է, թե Հայաստանը կարող է դիմակայել Ադրբեջանի յուրաքանչյուր գործողություն, հաղորդում է «Ազատություն» ռադիոկայանը:

Վաշինգտոնում Հայաստանի դեսպանատանը տված մամուլի ասուլիսի ժամանակ «Ամերիկայի Ձայն»-ի հարցին, թե լայնածավալ գործողություններ սկսելու դեպքում ի՞նչ զորքեր կկիրառի Ադրբեջանը՝ ցամաքայի՞ն, թե՞՝ օդային, Դավիթ Տոնոյանը արձագանքելն է, թե «Բաքուն կդիմի իր ունեցած բոլոր հնարավորություններին, իսկ մենք կդիմենք համապատասխան քայլերի»։

Ռուսաստանի ԱԳՆ-ի կողմից վերջերս հրապարակված հայտարարությունը, Հայաստանի պաշտպանության փոխնախարարի համոզմամբ, ուղղված էր երկու կողմերին։ Ինչ վերաբերում է Սոչիի հանդիպումից ակնկալիքներին, նա ասում է, թե առավելագույնը կարելի է ակնկալել մի նոր հայտարարություն, որից հետո Ադրբեջանը դժվար թե դադարեցնի իր գործողությունները։

Ռուս խաղաղապահներ տեղակայելու մասին մտավախությանը Դավիթ Տոնոյանը տալիս է հետեւյալ պատասխանը. «Նախնական քննարկում անգամ չի եղել այդ հարցով։ Հայկական զինված ուժերն ինքնուրույն ու հաջողությամբ կարողանում են կատարել այդ գործը։ Երրորդ ուժի տեղակայման հարց չենք դիտարկում ոչ Ռուսաստանի, ոչ էլ որեւէ այլ երկրի կամ կազմակերպության հետ։ Բացի այդ, խաղաղապահ ուժերի տեղակայումը հնարավոր է միայն խաղաղության ինչ-որ մի համաձայնագրի կնքումից հետո»։

Միջազգային համայնքից սպասելիքների մասին խոսելով՝ նա ասում է, թե գիտակցելով Հարավային Կովկասում կայունության կարեւորությունը, միջազգային համայնքը պիտի գտնի Ադրբեջանի վրա ազդելու լծակներ՝ կասեցնելու նրա այս վարքագիծը։ Հակառակ դեպքում, ասում է Հայաստանի պաշտպանության փոխնախարարը, կսկսվեն արյունալի զարգացումներ տարածաշրջանում։

Հայաստանը շարունակելու է պահպանել ռազմական բնագավառում հավասարակշռությունը։ Դավիթ Տոնոյանը հիշեցնում է, որ Հայաստանը Ռուսաստանից այդ նպատակով ձեռք է բերում ժամանակակից այնքան զենք, որքան հարկավոր է ադրբեջանցիներին կասեցնելու համար։ «Ու դա անելու ենք այնքան ժամանակ, մինչեւ մեր հարեւանը գա դարձի», - ասում է նա: