Հայաստանի Հանրապետությունը, որպես Արեւմտյան քաղաքակրթության ամենաարեւելյան ներկայացուցիչ, անվտանգության ապահովման պարտավորություններ ունի իր բոլոր քաղաքացիների, եւ հատկապես այն ազգային փոքրամասնությունների առջեւ, որոնք սեփական պետություն չունեն: Հայաստանյան այդ փոքրամասնությունները երկուսն են՝ ասորիները եւ եզդիները: Այդ մասին ասվում է Պահպանողական կուսակցության Կենտրոնական խորհրդի հայտարարության մեջ:

«Այսօր, երբ Իրաքում տեղի է ունենում եզդի ժողովրդի ցեղասպանություն, Հայաստանի Հանրապետությունը պարտավոր է ՄԱԿ-ում հանդես գալ որպես եզդի ժողովրդի իրավունքների եւ շահերի պաշտպան եւ ներկայացուցիչ՝ ՄԱԿ-ի Անվտանգության խորհրդից պահանջելով.

1.      Կտրուկ, այդ թվում՝ զինված միջամտություն՝ եզդի ժողովրդի ցեղասպանությունը դադարեցնելու նպատակով,

2.      Միջազգային երաշխավորված հնարավորություններ, որպեսզի Հայաստանի Հանրապետությունը կարողանա հումանիտար բազմակողմանի օգնություն ցույց տալ Իրաքի եզդի ժողովրդին,

3.      Միջազգային օժանդակություն՝ Հայաստանում ապաստանել ցանկացող իրաքյան եզդիներին Հայաստան տեղափոխելու համար, որը նաեւ նրանց հայաստանյան հայրենակիցների լիիրավ Հայրենիքն է:

Հայ ժողովուրդը 100 տարի առաջ ապրել է ցեղասպանության արհավիրքները, եւ միջազգային իրավունքի սուբյեկտ Հայաստանի պետությունն այսօր պարտավոր է բոլոր հնարավոր միջոցներով սատարել իր եզդի քաղաքացիների՝ մեծագույն ողբերգության մեջ հայտնված ցեղակիցներին»,- նշել են հայտարարության հեղինակները: