նախընտրելի դարձնելԱդրբեջանը մտադիր է ատոմային ծրագիր սկսել:
Ադրբեջանական լրատվամիջոցները, վկայակոչելով երկրի կապի եւ բարձր տեխնոլոգիաների նախարար Իլթիմաս Մամեդովին, հաղորդում են, որ մոտ օրերս ակնկալվում է կանոնադրության եւ իրավաբանական փաստաթղթերի հաստատում՝ Ատոմային հետազոտությունների ազգային կենտրոնի գործունեությունը սկսելու նպատակով:
Նրա խոսքով՝ ներկայումս նշված փաստաթղթերի նախապատրաստման, կենտրոնի կառուցման վայրի ընտրության աշխատանքներ են տարվում: Այդ բոլոր հարցերը կլուծվեն մինչեւ տարվա վերջ:
«Նախապատրաստական աշխատանքների ավարտից հետո կորոշվեն երկրները, որոնց հետ ծրագրվում է համագործակցել», - հստակեցրել է Մամեդովը:
Ավելի վաղ Ադրբեջանի Հանրապետության նախագահը Կապի եւ բարձր տեխնոլոգիաների նախարարությանը կից «Ատոմային հետազոտությունների ազգային կենտրոն» փակ բաժնետիրական ընկերություն ստեղծելու մասին հանձնարարություն էր ստորագրել:
