նախընտրելի դարձնելՀատուկ քննչական ծառայությունում (ՀՔԾ) ավարտվել է իշխանության ներկայացուցչի նկատմամբ բռնություն գործադրելու եւ խուլիգանության կատարելու դեպքի առթիվ հարուցված քրեական գործի նախաքննությունը:
Ինչպես NEWS.am-ը տեղեկանում է Գլխավոր դատախազության մամուլի ծառայությունից, քրեական գործի նախաքննության օրինականության նկատմամբ հսկողություն իրականացնող դատախազը հաստատել է մեղադրական եզրակացությունը:
Նախաքննությամբ պարզվել է, որ 2010թ. մայիսի 31-ին` ժամը 18-ի սահմաններում, Դ. Քիրամիջյանը Մարտիրոս Սարյանի արձանին հարող տարածքում վիճաբանել է պատահական անցորդ Վ. Թադեւոսյանի հետ, բռնություն գործադրել նրա նկատմամբ` ձեռքերով եւ ոտքերով հարվածներ հասցնելով նրա մարմնի տարբեր մասերին: Դ. Քիրամիջյանի եւ մյուսների խուլիգանական գործողությունները կասեցվել են ՊՊԾ գնդի ջոկի հրամանատար Ա. Բաղդասարյանի եւ ոստիկանության մյուս աշխատակիցների միջամտության արդյունքում:
Կատարած իրավախախտման համար ոստիկանների կողմից Դ. Քիրամիջյանին բերման ենթարկելիս քաղաքացի Ս. Գեւորգյանը կյանքի եւ առողջության համար ոչ վտանգավոր բռնություն է գործադրել իշխանության ներկայացուցիչ հանդիսացող, իր ծառայողական պարտականությունները կատարող` ՀՀ ոստիկանության ՊՊԾ գնդի ոստիկան Ա. Բաղդասարյանի նկատմամբ, այն է` քաշքշել է նրան եւ պոկել ուսադիրը:
Ձեռք բերված ապացույցների հիման վրա` Դ. Քիրամիջյանին մեղադրանք է առաջադրվել ՀՀ քրեական օրենսգրքի 258-րդ հոդվածի 3-րդ մասի 1-ին կետով, իսկ Ս. Գեւորգյանին` ՀՀ քրեական օրենսգրքի 316-րդ հոդվածի 1-ին մասով:
Քրեական գործն ուղարկվել է Երեւանի Կենտրոն եւ Նորք-Մարաշ վարչական շրջանների ընդհանուր իրավասության դատարան` ըստ էության քննելու համար:
Այնինչ, ընդդիմությունը պնդում է, որ երիտասարդ ակտիվիստները փորձել են մուտք գործել Ազատության հրապարակ, սակայն ոստիկանները բռնություն են գործադրել երիտասարդների նկատմամբ, ծեծել են նրանց եւ տարել ոստիկանություն: Հետագայում բռնված երիտասարդներին բաց են թողել, բացառությամբ Դ. Քիրամիջյանի: Վերջինիս մարմնի վրա եղել են բռնության հետքեր, այնինչ ոստիկաններից ոչ ոք չի տուժել:
