«Բյուրեղավանի երեխաների խնամքի եւ պաշտպանության գիշերօթիկ հաստատություն» ՊՈԱԿ-ի պաշտոնատար անձանց կողմից յուրացումներ կատարելու դեպքի առթիվ ՀՀ քննչական կոմիտեի ՀԿԳ քննության գլխավոր վարչության վարույթում քննվող քրեական գործի շրջանակներում մեղադրանքներ են առաջադրվել նաեւ ՊՈԱԿ-ի գլխավոր հաշվապահ Փ.Մարտիրոսյանին եւ կադրերի գծով տեսուչ Ա.Հովսեփյանին։

ՀՀ քննչական կոմիտեից հայտնում են, որ նախաքննության ընթացքում ձեռք բերված ապացույցների համաձայն՝ Փ. Մարտիրոսյանը, աշխատելով «Բյուրեղավանի երեխաների խնամքի եւ պաշտպանության գիշերօթիկ հաստատություն» ՊՈԱԿ-ում՝ որպես գլխավոր հաշվապահ, օժանդակել է հաստատության տնօրենին վստահված առանձնապես խոշոր չափերով գումարի յուրացում կատարելուն։ Այն է՝ 2004-2014 թվականների ընթացքում հաշվարկել եւ պետական բյուջեից ՊՈԱԿ փոխանցված գումարներից ՊՈԱԿ-ում հրամանագրված, սակայն փաստացի աշխատանքներ չկատարող 28 աշխատակիցների անուններով ելքագրել է առանձնապես խոշոր չափերով գումար, որը յուրացվել է տնօրենի կողմից:

Բացի այդ, նախաքննությամբ պարզվել է, որ նա օժանդակել է նաեւ առանձնապես խոշոր չափերով գումարի վատնում կատարելուն, այն է` ՊՈԱԿ-ում հրամանագրված, սակայն փաստացի չաշխատող 4 աշխատակցի, այդ թվում՝ իր երկու հարազատների անվամբ հաշվարկել եւ ելքագրել է առանձնապես խոշոր չափերով գումար։ Ելքագրված գումարներից իր հարազատների անվամբ հաշվարկված գումարն ստացել է անձամբ, իսկ մնացած գումարը տրվել է ՊՈԱԿ-ի այլ աշխատակիցներին՝ որպես լրավճար:

Կադրերի գծով տեսուչ Ա.Հովսեփյանը, նախաքննությամբ ձեռք բերված ապացույցների համաձայն, ՊՈԱԿ-ի տնօրեն Գայանե Մարգարյանի հանձնարարությամբ, 2007-2014 թվականների ընթացքում, պատրաստել է համապատասխան փաստաթղթեր, որոնց հիման վրա տնօրենը հրամանագրել է ՊՈԱԿ-ում փաստացի աշխատանքներ չկատարող աշխատակիցների, որոնց անվամբ ելքագրվել է առանձնապես խոշոր չափերով գումար՝ այդպիսով օժանդակելով առանձնապես խոշոր չափերով գումարի յուրացում եւ վատնում կատարելուն։

Քրեական գործի նախաքննությամբ ձեռք բերված ապացույցների բավարար համակցությամբ նոյեմբերի 28-ին Փ.Մարտիրոսյանին եւ Ա.Հովսեփյանին մեղադրանք է առաջադրվել ՀՀ քրեական օրենսգրքի 38-179-րդ հոդվածի 3-րդ մասի 1-ին կետով` առանձնապես խոշոր չափերով յուրացում կատարելուն օժանդակելու համար, եւ ՀՀ քրեական օրենսգրքի 38-179-րդ հոդվածի 3-րդ մասի 1-ին կետով՝ առանձանապես խոշոր չափերով վատնում կատարելուն օժանդակելու համար: Նրանց նկատմամբ որպես խափանման միջոց է ընտրվել ստորագրություն չհեռանալու մասին։

Հիշեցնենք, որ ՊՈԱԿ-ի տնօրեն Գայանե Մարգարյանին մեղադրանք է առաջադրվել նոյեմբերի 27-ին եւ նրա նկատմամբ որպես խափանման միջոց է ընտրվել կալանավորումը։

Նախաքննությունը շարունակվում է։