Մարտի 1 իրականացրած ռեժիմը կարող է բռնությունների գնալ նաեւ ապրիլի 24-ին։ Այս մասին այսօր՝ դեկտեմբերի 3-ին, լրագրողների հետ հանդիպմանը հայտարարեց «Նախախորհրդարանի» անդամ Գարեգին Չուգասզյանը։
«Եթե ապրիլի 24-ին Մեծ եղեռնի 100-ամյակին որեւիցե ուժ հրաման արձակի կրակ բացել ժողովրդի վրա, դրանով ինքը կստորագրի իր Թալեաթի դատավճիռը։ Եթե նման հրաման տվողներ կան, թող ուշադիր լինեն իրենց ապագայի եւ իրենց ունեցվածքի նկատմամբ։ Այդ բոլորը արվելու է համաշխարհային մամուլի ներկայությամբ եւ հազարավոր սփյուռքահայերի աչքերի առաջ, որոնք Մարտի 1-ին չեն եղել եւ չեն պատկերացնում՝ ինչ է եղել շատ ավելի հստակ, նկարահանված ձեւով կստանան այդ բոլորը»,- ասաց Չուգասզյանը։
«Նախախորհրդարանի» անդամ Գեւորգ Սաֆարյանի խոսքով՝ ապրիլի 24-ին իրենց շարժման մասնակիցները Մարտի 1-ի նման տուն չեն գնալու, հարկ եղած դեպքում նույնիսկ պատրաստ են զենքի դիմել։
«Մարտի 1-ին մարդիկ քարով դուրս էին գալիս ավտոմատի դեմ, միայն թե վերջում ինչ-որ մեկն ասեց՝ գնացեք տուն։ Մարտի 1-ով մեզ պետք չէ վախեցնել, եթե մեր վրա ուզում են կրակեն, մենք էլ շատ լավ կրակում ենք։ Հստակ լինի բոլորի համար ապրիլի 24-ին մենք տուն գնացողը չենք, ուզում են կրակեն, թող կրակեն, մենք էլ կկրակենք»,- ասաց Գեւորգ Սաֆարյանը։
Հիշեցնենք, որ «Նախախորհրդարանի» նախաձեռնած «Հարյուրամյակն առանց ռեժիմի» շարժումը հայտարարել է, որ 2015թ. ապրիլի 24-ին իշխանափոխություն է իրականացնելու։




























