նախընտրելի դարձնել«Վերնիսաժում» մայիսի 17-ին հնչած կրակոցներից վիրավորված, ապա կալանավորված Վալերիկ Հովհաննիսյանը, որին դեկտեմբերի 5-ին «Նուբարաշեն» ՔԿՀ-ից տեղափոխել էին Երեւանի թիվ 1 կլինիկական հիվանդանոց, մեկ օր անց էլ վերադարձրել կալանավայր, դեռ չի վիրահատվել:
NEWS.am-ի թղթակցի հետ զրույցում ամբաստանյալի փաստաբան Արայիկ Ալվանդյանը հայտնեց, որ դեռ փաստաթղթերի հետ կապված խնդիրներ կան:
«Վիրահատման օրերն են, պետք է վիրահատվի, պարզապես փաստաթղթերի հետ կապված խնդիրներ էին առաջացել, հիմա դրանք ենք լուծում, որ տեղափոխենք հիվանդանոց: Կարծում եմ, որ մինչեւ շաբաթվա վերջ արդեն քաղաքացիական հիվանդանոց կտեղափոխվի, բայց դժվար թե վիրահատությունն արվի այդքան շուտ»,- ասաց փաստաբանը:
Մեր հարցին՝ հնարավոր է դեկտեմբերի 12-ին նշանակված դատը նորից հետաձգվի, Արայիկ Ալվանդյանը պատասխանեց, որ դեռ վաղ է այդ մասին խոսելը:
Հիշեցնենք, որ 2014թ. մայիսի 17-ին՝ ժամը 13:30-ի սահմանում կրակոցներ էին հնչել «Վերնիսաժի» տարածքում։ Ըստ մեղադրական եզրակացության՝ Գոռ Առաքելյանը (ԱԺ ԲՀԿ-ական պատգամավոր Կարո Կարապետյանի փեսան) Վարդանանց փողոցի թիվ 18/2 շենքի ստորգետնյա ավտոկայանատեղիի մուտքի դարպասների մոտ վեճի բռնվելով Վալերիկ Հովհաննիսյանի եւ Ներսես Մելքոնյանի հետ, փորձել է ապօրինաբար դիտավորությամբ կյանքից զրկել նրանց, ինչպես նաեւ անկանոն կրակ է բացել՝ ծանր մարմնական վնասվածքներ հասցնելով պատահական անցորդների։ Գոռ Առաքելյանը մայիսի 18-ին ինքնակամ ներկայացել էր ոստիկանություն: Նրա դեմ մեղադրանք է առաջադրվել սպանության փորձ կատարելու, ինչպես նաեւ երկու եւ ավելի անձանց առողջությանը ծանր, մեկ անձի՝ միջին ծանրության վնաս պատճառելու համար, իսկ խափանման միջոց է ընտրվել կալանավորումը։ Ավելի ուշ կալանավորվել են նաեւ Ներսես Մելքոնյանը եւ Վալերի Հովհաննիսյանը՝ խուլիգանության մեղադրանքով։
Գոռ Առաքելյանին մեղադրանք է առաջադրվել Քրեական օրենսգրքի 34-104-րդ հոդվածի 2-րդ մասի, 1-ին, 6-րդ եւ 10-րդ կետերով, 112-րդ հոդվածի 2-րդ մասի, 1-ին, 5-րդ, 9-րդ կետերով, 113-րդ հոդվածի 2-րդ մասի 6-րդ կետով, 235-րդ հոդվածի 1-ին մասով: Վալերիկ Հովհաննիսյանին եւ Ներսես Մելքոնյանին մեղադրանք է առաջադրվել Քրեական օրենսգրքի 258-րդ հոդվածի 3-րդ մասի 1-ին կետով։
