նախընտրելի դարձնելԱֆղանստանը «վտանգավոր վայր» կմնա ամերիկյան զորքերի դուրսբերումից հետո, եւ այնտեղ ծառայությունը շարունակող զինվորականները ռիսկի կենթարկվեն: Այս մասին դեկտեմբերի 28-ին հայտարարել է ԱՄՆ նախագահ Բարաք Օբաման:
Աֆղանստանում ԱՄՆ-ի եւ ՆԱՏՕ-ի՝ 13 տարի տեւած գործողության ավարտը, ըստ Օբամայի, դարձել է այդ երկրի համար «գլխավոր իրադարձությունը»: «Մեր զինծառայողների անհավատալի ինքնանվիրումի շնորհիվ մեր ռազմական գործողությունն Աֆղանստանում ավարտվում է, եւ Ամերիկայի պատմության մեջ ամենաերկար պատերազմը մոտենում է համապատասխան ավարտին», — ասել է նա:
Օբաման հիշեցրել է, որ Աֆղանստան ներխուժելու շնորհիվ հաջողվել է ոչնչացնել «Ալ Քաիդայի» ղեկավարությանը, այդ թվում նաեւ նրա առաջնորդ Ուսամա բեն Լադենին, իսկ երկրի բնակիչները հնարավորություն ստացան մասնակցել ժողովրդավարական ընտրությունների:
ԱՄՆ-ն եւ դաշնակիցները կպահպանեն սահմանափակ ռազմական ներկայությունն Աֆղանստանում՝ աֆղանական զորքերի նախապատրաստման, խորհրդատվության եւ աջակցության, ինչպես նաեւ «Ալ Քաիդայի» գրոհայինների դեմ պայքարելու համար:
Օբաման նաեւ շնորհակալություն է հայտնել եւ հարգանքի տուրք մատուցել Աֆղանստանում զոհված շուրջ 2 հազար զինծառայողներին, հայտնում է «lenta.ru»-ն՝ վկայակոչելով Associated Press-ը:
Դեկտեմբերի կեսին Օբաման հայտարարել էր, որ 2015 թ. Աֆղանստանում եւ Իրաքում 180 հազար զինծառայողներից կմնա շուրջ 15 հազար մարդ: ՆԱՏՕ-ի ուժերը Աֆղանստանը վերջնականապես կլքեն 2016 թ.:
