նախընտրելի դարձնելԱդրբեջանը տարածաշրջանում մարդու իրավունքների պաշտպանության բնագավառում վերջին տեղում է, նշվում է Freedom House-ի այսօր հրապարակված «Ազատությունն աշխարհում - 2015» զեկույցում, հայտնում է NEWS.am-ի թղթակիցը Վաշինգտոնից:
Ըստ զեկույցի հեղինակների՝ Ադրբեջանը, Թուրքիան, Հունգարիան, Ռուսաստանը եւ Նիգերիան 2014 թ. մարդու իրավունքների պաշտպանության բնագավառում արձանագրել են աշխարհում ամենամեծ հետընթացը: Հայաստանը ստացել է 5 բացասական միավոր քաղաքական իրավունքների եւ 4 բացասական միավոր քաղաքացիական ազատությունների համար, Ադրբեջանը ստացել է 6-ական միավոր՝ երկու կատեգորիաների պարագայում:
«2014 թ. Վենեսուելայում եւ Ադրբեջանում քաղբանտարկությունների թիվը մշտապես աճել է, ընդ որում՝ երկու երկրների ղեկավարները մշտապես արդարացրել են դա արտասահմանյան գործակալների դեմ պայքարով», - նշվում է Freedom House-ի զեկույցում:
Ադրբեջանի նախագահ Իլհամ Ալիեւին չնկատված ինքնակալ անվանելով՝ զեկույցի հեղինակները նշում են, որ Ալիեւը «մշտապես ռադարի մակարդակից ցածր է շարժվում»՝ փորձելով չերեւալ: Ընդ որում, Ադրբեջանի իշխանությունները երկար տարիներ շարունակել են հալածանքները մամուլի եւ քաղաքացիական հասարակության նկատմամբ՝ ձերբակալություններ կատարելով եւ ֆիզիկական բռնություն իրականացնելով լրագրողների եւ իրավապաշտպանների հանդեպ, հավելում են զեկույցի հեղինակները:
«Ադրբեջանի նախագահ Իլհամ Ալիեւը վիճելի վերընտրման է հասել՝ հաղթելով ջախջախված ընդդիմությանը, որը թուլացած էր կալանավորումներից եւ իրավական խոչընդոտներից. Եվ ռեժիմը ակտիվացրեց քաղաքացիական ակտիվիստների, լրագրողների եւ այլ թվացյալ թշնամիների կալանավորումները,- ընդգծվում է Freedom House-ի զեկույցում։ - Չնայած նրան, որ տարեցտարի այնտեղ քաղաքական իրավունքների եւ քաղաքացիական ազատությունների հետ կապված վիճակը վատանում է, Ադրբեջանին հաջողվում է խուսանավել ժողովրդավար աշխարհի քննադատությունից՝ շնորհիվ էներգակիրների առատության եւ անվտանգության ոլորտում համագործակցության»։
