ՀՀ հատուկ քննչական ծառայությունում ստացվել են նյութեր այն մասին, որ ՀՀ արդարադատության նախարարության «Հրազդան» քրեակատարողական հիմնարկի հատուկ ծառայություն իրականացնող  անձը, իր պաշտոնեական դիրքը ծառայության  շահերին  հակառակ օգտագործելով, 2015 թվականի մարտի 31-ին իր ծանոթից ստացել եւ դատապարտյալին փոխանցելու նպատակով քրեակատարողական հիմնարկ է փոխադրել  փաթեթավորված 3 բջջային հեռախոս՝ լիցքավորիչներով, որոնք թաքցրել է հիշյալ հիմնարկի տարածքում:

ՀՔԾ մամուլի ծառայությունից հայտնում են, որ նույն  օրը քրեակատարողական հիմնարկի  աշխատակիցների  կողմից  հայտնաբերվել է հեռախոսներով եւ լիցքավորիչներով փաթեթը, որոնցից երկուսում թաքցված է եղել խոշոր չափերի հասնող «Բուպրենորֆին» տեսակի թմրամիջոց:

Հատուկ ծառայություն իրականացնող անձի կողմից պաշտոնեական լիազորությունները չարաշահելու եւ իրացնելու նպատակով ազատազրկման վայր թմրամիջոց փոխադրելու դեպքերի առթիվ ՀՀ հատուկ քննչական ծառայությունում ՀՀ քրեական  օրենսգրքի  308-րդ  հոդվածի  1-ին  մասի եւ  266-րդ  հոդվածի 2-րդ մասի 2-րդ եւ 3-րդ կետերի հատկանիշներով հարուցվել է քրեական գործ:

Կատարվում է նախաքննություն: