Ավագանու անդամ Րաֆֆի Գյոզալյանը «Բարգավաճ Հայաստան» խմբակցությունից դուրս գալու դիմում է ներկայացրել, սակայն կմնա ավագանու անդամ:  Այս մասին այսօր՝ ապրիլի 14-ին, Երեւանի ավագանու գումարված արտահերթ նիստում, նախքան օրակարգի հարցերին անցնելը, տեղեկացրել է Երեւանի քաղաքապետ Տարոն Մարգարյանը:

NEWS.am-ը Երեւանի քաղաքապետարանի տեղեկատվության եւ հասարակայնության հետ կաpերի վարչությունից տեղեկացավ, որ ավագանին քննարկել եւ հավանություն է տվել  «Գազպրոմ Արմենիա» փակ բաժնետիրական ընկերության կողմից ներկայացված ներդրումային ծրագրին, որի շրջանակում նախատեսվում է մայրաքաղաքի Ծարավ Աղբյուրի փողոցի հ.55/25 հասցեում կառուցել կրթական համալիր:

Համաձայն ծրագրի համալիրը ներառելու է  հանրակրթական դպրոց, մանկապարտեզ, փակ  լողավազան, սպորտային դահլիճ, մինի ֆուտբոլի համար նախատեսված հրապարակ: Համալիրը կունենա նաեւ  փակ  սառցադաշտ, ստորգետնյա  ավտոկանգառ, ինչպես նաեւ  բարեկարգ  հանգստյան գոտի: Ծրագրի իրականացման արդյունքում կստեղծվի ավելի քան 236 աշխատատեղ։ Նկատի առնելով վերը նշվածը՝ ավագանին որոշել է Երեւանի քաղաքային  համայնքի սեփականություն համարվող Ծարավ Աղբյուրի փողոցի հ.55/25  հասցեում գտնվող հողամասը եւ շինությունները ուղղակի վաճառքի ձեւով օտարել «Գազպրոմ Արմենիա» փակ բաժնետիրական ընկերությանը: Համաձայն ծրագրի՝ ընկերության կողմից նախատեսվող  ներդրման  չափը նախնական կազմում է  49.3 մլն ԱՄՆ դոլարին համարժեք դրամ։