նախընտրելի դարձնել
Հայաստանը ողջունում է Եվրոպական խորհրդարանի կողմից Հայոց ցեղասպանության 100-րդ տարելիցի կապակցությամբ ընդունված բանաձեւը։ Այդ մասին ասվում է Եվրախորհրդարանի կողմից Հայոց ցեղասպանության 100-րդ տարելիցի կապակցությամբ ընդունված բանաձեւի վերաբերյալ ԱԳ նախարար Էդվարդ Նալբանդյանի հայտարարության մեջ։
«Եվրախորհրդարանը ընդգծում է, որ դեռ 1987թ. իր կողմից ընդունված բանաձեւում Օսմանյան կայսրությունում 1915-1917թթ. հայերի դեմ կատարվածը որակվել է որպես ցեղասպանություն՝ համապատասխան ՄԱԿ-ի Ցեղասպանության հանցագործության կանխարգելման եւ պատժման մասին կոնվենցիայի, եւ դատապարտում է դրա ժխտումը։
28 եվրոպական երկիր ներկայացնող խորհրդարանը, հարգանքի տուրք մատուցելով Ցեղասպանության մեկուկես միլիոն հայ նահատակների հիշատակին, միանում է Հայոց ցեղասպանության 100-րդ տարելիցի ոգեկոչմանը եւ կոչ անում Եվրոպական հանձնաժողովին եւ Եվրոպական խորհրդին հետեւել իր օրինակին։
Եվրամիության օրենսդիր մարմինը ցեղասպանությունների կանխարգելումը եւ մարդկության դեմ հանցագործությունների համար պատշաճ պատիժը համարում է միջազգային հանրության առաջնահերթություն։
Բանաձեւը կարեւոր ուղերձ է Թուրքիային՝ օգտագործել Հայոց ցեղասպանության 100-րդ տարելիցի առիթը առերեսվելու իր պատմությանը, ճանաչելու Հայոց ցեղասպանությունը եւ դրանով ճանապարհ հարթելու հայ եւ թուրք ժողովուրդների իրական հաշտեցման համար։
Այս բանաձեւի ընդունմամբ Եվրոպական խորհրդարանը եւս մեկ անգամ վերահաստատեց իր հավատարմությունը մարդու իրավունքների պաշտպանությանը եւ համամարդկային արժեքներին»,- նշել է Նալբանդյանը։
Ինչպես ավելի վաղ հայտնել էր NEWS.am-ը, Եվրախորհրդարանը Հայոց ցեղասպանության 100-րդ տարելիցի նախաշեմին ձայների մեծամասնությամբ բանաձեւ է ընդունել: «Հայոց ցեղասպանության 100-րդ տարելիցը» թեմայով քննարկումներն ընթացել են ապրիլի 15-ին, խորհրդարանի լիագումար նիստում:
Բանաձեւը Եվրախորհրդարան է մտել Հայ դատի հանձնախմբի եւ ֆրանսիացի լիբերալ պատգամավոր Ժան Մարի Կավադայի նախաձեռնությամբ:
