Նախընտրելի
Ծիծեռնակաբերդի հուշահամալիրի ճարտարապետ Սաշուր Քալաշյանը, համահեղինակի իրավաժառանգ՝ ճարտարապետ Անահիտ Թարխանյան եւ ճարտարապետ Լ. Մկրտչյանը հայտարարություն են տարածել։
«Մեծագույն ափսոսանքով ու նաեւ վրդովմունքով ենք տեղեկացնում, որ Հայոց Ցեղասպանության 100-րդ տարելիցի ընթացիկ միջոցառմանը համայն աշխարհին ներկայանալու ենք Ծիծեռնակաբերդի հուշահամալիրի տիրույթում օրերս ապօրինաբար ու անհայտ հեղինակմամբ հայտնված, մեծաչափ ու անհեթեթ մի՝ իբր ժամանակավոր «Տաղավարով» , որն անհանդուրժելիորեն խաթարել ու գռեհկորեն նսեմացրել է Հուշահամալիրի գեղագիտական կեսդարյա անաղարտ կերպարը, աղճատել նրա ամբողջական դիտաընկալման տեսահորիզոնը: Այս իրողությունը հերթական ու վառ վկայությունն է մեր իրավազանց իշխանավորների մշակութային սնանկության, եւ ազգային արժեքների հանդեպ օրըստօրե ուժգնացող քամահրանքի:
Ծիծեռնակաբերդի հուշահամալիրը ոչ միայն մեր՝ հեղինակ քաղաքացիներիս, այլ համայն հայության հոգեւոր ու նյութական սեփականությունն է, եւ նրա նկատմամբ ամեն մի անխոհեմ ոտնձգություն արձագանքվելու է բոլորիս հոգիներում:
Ուստի կոչ ենք անում բոլոր նրանց, ովքեր դեռ սնվում ու հպարտանում են ազգային արժեքներով, անհապաղ այցելել հուշահամալիր, ականատես լինել իրադրությանը եւ օր առաջ միանալ բողոքարկման գործընթացին»,- ասվում է հայտարարության մեջ:
