նախընտրելի դարձնել
ՀՀ քննչական կոմիտեի Լոռու մարզային քննչական վարչությունում ավարտվել է բռնության գործադրմամբ 23-ամյա աղջկան առեւանգելու դեպքի առթիվ հարուցված քրեական գործի նախաքննությունը։
2015 թվականի մարտի 16-ին Լոռու մարզի մի բնակչուհի գրավոր հաղորդում է տվել, որ Վանաձորի Մաշտոցի փողոցից, բռնության գործադրմամբ, առեւանգել են դստերը:
Դեպքի առթիվ 2015 թվականի մարտի 16-ին ՀՀ քննչական կոմիտեի Լոռու մարզային քննչական վարչությունում հարուցվել է քրեական գործ՝ ՀՀ քրեական օրենսգրքի 131-րդ հոդվածի 2-րդ մասի 1-ին կետով:
Նախաքննությամբ պարզվել են աղջկա առեւանգման հանգամանքները, առերեւույթ հանցագործություն կատարած անձանց ինքնությունը։ Քննության տվյալներով՝ Լոռու մարզի բնակիչ Վ.Մալաքյանը նախապես իմացել է, որ 23-ամյա աղջիկը չի ցանկանում իր հետ ամուսնանալ, սակայն նախնական համաձայնության է եկել իր երեք ընկերների հետ նրան առեւանգելու հարցի շուրջ։ Պայմանավորվածության համաձայն՝ 2015 թվականի մարտի 15-ին՝ ժամը 15:00-ի սահմաններում, «Օպել» մակնիշի ավտոմեքենայով դարանակալել են, իսկ երբ տեսել են աղջկան եւ նրան ուղեկցողին, վերջիններիս դիմադրությունը ճնշելու եւ հաղթահարելու համար մեկը բռնել է ուղեկցողի հագուստից, իսկ մյուս երկուսը բռնության գործադրմամբ, աղջկան կամքին հակառակ նրան նստեցրել են ավտոմեքենան եւ առեւանգել:
Մինչդատական վարույթի ընթացքում ձեռք բերված ապացույցների համակցությամբ 4 անձի մեղադրանք է առաջադրվել ՀՀ քրեական օրենսգրքի 131-րդ հոդվածի 2-րդ մասի 1-ին կետով:
Քրեական գործը՝ մեղադրական եզրակացությամբ, ուղարկվել է նախաքննության օրինականության նկատմամբ հսկողություն իրականացնող դատախազին:
